പ്രാഗ്: പ്രജ്ഞാനന്ദ പ്രാഗ് മാസ്റ്റേഴ്സ് ചെസില്‍ ആറാം റൗണ്ടില്‍ അട്ടിമറി ജയത്തോടെ മുന്നിലേക്ക് കുതിക്കുകയാണ്. അതുവരെ ടൂര്‍ണ്ണമെന്‍റില്‍ മുന്നില്‍ നില്‍ക്കുകയായിരുന്ന ഉസ്ബെക്കിസ്ഥാന്റെ നോഡിര്‍ബെക് അബ്ദുസത്തറോവിനെ അട്ടിമറിച്ചാണ് പ്രജ്ഞാനന്ദ ഇപ്പോള്‍ മൂന്നര പോയിന്‍റുകളോടെ രണ്ടാം സ്ഥാനത്തെത്തിയിരിക്കുന്നത്. മൂന്നര പോയിന്‍റുകളോടെ പര്‍ഹാം മഗ് സൂദ്ലു , റിച്ചാര്‍ഡ് റപ്പോര്‍ട് എന്നിവരും രണ്ടാം സ്ഥാനത്തുണ്ട്. വളരെ പിന്നിലായിരുന്ന പ്രജ്ഞാനന്ദ കഴിഞ്ഞ ദിവസം ഇന്ത്യയുടെ വിദിത് ഗുജറാത്തിയെയും തോല്‍പിച്ചിരുന്നു.
ഇപ്പോഴും ടൂര്‍ണ്ണമെന്‍റില്‍ അബ്ദുസത്തറോവ് തന്നെയാണ് നാല് പോയിന്‍റുകളോടെ മുന്നില്‍ നില്‍ക്കുന്നത്. ഇനി മൂന്ന് റൗണ്ട് കൂടി മത്സരം ബാക്കിയുണ്ട്. അതുവരെ ടൂര്‍ണ്ണമെന്‍റില്‍ രണ്ടാം സ്ഥാനത്തായിരുന്ന ഇറാന്റെ പര്‍ഹാം മഗ് സൂദ്ലു ഏഴാം റൗണ്ടില്‍ തോറ്റതും പ്രജ്ഞാനന്ദയ്‌ക്ക് അനുഗ്രഹമായി. ചെക് റിപ്പബ്ലിക്കിന്റെ ഗുയെന്‍ തായ് ഡല്‍ വാന്‍ ആണ് പര്‍ഹാം മഗ് സൂദ്ലുവിനെ അട്ടിമറിച്ചത്.
കറുത്ത കരുക്കളുമായി കളിച്ച പ്രജ്ഞാനന്ദ കളിയില്‍ ഉടനീളം വെളുത്ത കരുക്കളുമായി കളിച്ച അബ്ദുസത്തറോവിന് സമ്മര്‍ദ്ദം കൊടുക്കുകയായിരുന്നു. റുയ് ലോപസ് എന്ന ശൈലിയിലുള്ള ഓപ്പണിംഗ് ആണ് പ്രജ്ഞാനന്ദ ഉപയോഗിച്ചത്. ഓരോ നീക്കം പിന്നിടുന്തോറും അബ്ദുസത്തറോവ് കൂടുതല്‍ സമ്മര്‍ദ്ദത്തിലാണ്ടു. ഒടുവില്‍ തോല്‍വി സമ്മതിച്ചു. മൂന്ന് പോയിന്‍റുകളോടെ ഗുയെന്‍ തായ് ഡല്‍ വാന്‍, വിന്സെന്റ് കെയ്‌മര്‍, ഡേവിഡ് നവാര എന്നിവര്‍ മൂന്നാം സ്ഥാനത്തുണ്ട്.
