ന്യൂദല്ഹി: ലോക്സഭാ തെരഞ്ഞെടുപ്പിനുള്ള ബിജെപിയുടെ ആദ്യഘട്ടസ്ഥാനാര്ത്ഥി പട്ടികയില് പ്രമുഖരുടെയും പുതുമുഖങ്ങളുടെയും വനിതകളുടെയും നിര. പ്രധാനമന്ത്രി നരേന്ദ്ര മോദി മൂന്നാംതവണയും വാരാണസിയില് എത്തുമ്പോള് ഭൂരിപക്ഷത്തിലെ വര്ധന മാത്രമാണ് ചര്ച്ചയാവുക.
2014ല് ആപിന്റെ അരവിന്ദ് കേജ്രിവാളും 2019ല് എസ്പിയുടെ ശാലിനി യാദവുമായിരുന്നു വാരാണസിയില് മോദിയുടെ പ്രധാന എതിരാളികള്. 2009ല് മുതിര്ന്ന ബിജെപി നേതാവ് മുരളി മനോഹര് ജോഷി 17,211 വോട്ടുകള്ക്കാണ് കോണ്ഗ്രസില് നിന്ന് മണ്ഡലം തിരിച്ചു പിടിച്ചത്. 2014ല് മോദി ഈ ഭൂരിപക്ഷം 3,71,784 ആയും 2019ല് ഇത് 4,79,505 ആയും ഉയര്ത്തി. കേന്ദ്ര ആഭ്യന്തരമന്ത്രി അമിത് ഷാ ഗാന്ധിനഗറില് നിന്നും കേന്ദ്രപ്രതിരോധമന്ത്രി രാജ്നാഥ് സിങ് ലഖ്നൗവില് നിന്നും വീണ്ടും ജനവിധി തേടുന്നു.
കേന്ദ്രമന്ത്രിമാരായ കിരണ് റിജിജു(അരുണാചല് വെസ്റ്റ്), സര്വാനന്ദ സോനോവാള്(ദിബ്രുഗഡ്), സ്മൃതി ഇറാനി (അമേഠി), ശ്രീപദ് യശോനായക്(ഗോവ), പുരുഷോത്തം രൂപാല(രാജ്കോട്ട്), മന്സൂഖ് മാണ്ഡവ്യ (പോര്ബന്തര്), ഡോ. ജിതേന്ദ്രസിങ് (ഉദംപൂര്), അന്നപൂര്ണ്ണാ ദേവി(കൊദര്മ), അര്ജ്ജുന്മുണ്ട (ഖുന്തി), രാജീവ് ചന്ദ്രശേഖര്(തിരുവനന്തപുരം), വി. മുരളീധരന് (ആറ്റിങ്ങല്), ജ്യോതിരാദിത്യ സിന്ധ്യ(ഗുണ), ഫഗന്സിങ് കുലസ്തെ (മാണ്ട്ല), അര്ജ്ജുന് റാം മേഘ്വാള്(ബിക്കാനീര്), ഭൂപേന്ദ്ര യാദവ്, ഗജേന്ദ്രസിങ് ഷെഖാവത്ത്(ജോദ്പൂര്), ജി. കിഷന് റെഡ്ഡി (സെക്കന്തരാബാദ്), അജയ്ഭട്ട് (നൈനിറ്റാള്-ഉദ്ദംസിങ് നഗര്), സാധ്വി നിരഞ്ജന് ജ്യോതി (ഫത്തേപൂര്), ഭൂപേന്ദ്രയാദവ് (അല്വാര്), നിഷിത് പ്രാമാണിക്(കൂച്ച് ബെഹാര്), പി.പി. ചൗധരി (പാലി), എസ്.പി. സിങ് ബാഗേല് (ആഗ്ര), അജയ്മിശ്ര തേനി (ലഖിംപൂര്ഖേരി), ദേവുസിങ് ചൗഹാന്(കേഡ), ഡോ. സുഭാഷ് സര്ക്കാര് (ബാങ്കുര) തുടങ്ങിയവരുള്പ്പെടെ 34 കേന്ദ്രമന്ത്രിമാരാണ് ആദ്യപട്ടികയിലുള്ളത്.
ലോക്സഭാ സ്പീക്കര് ഓം ബിര്ള (കോട്ട), മുന് മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന് (വിദിഷ), ത്രിപുര മുന് മുഖ്യമന്ത്രി വിപ്ലവ് കുമാര് ദേവ് (ത്രിപുര വെസ്റ്റ്) എന്നിവരും ആദ്യ പട്ടികയിലുണ്ട്. നടിയും മുന് എംപിയുമായ ഹേമമാലിനി (മഥുര), സാക്ഷി മഹാരാജ് (ഉന്നാവ), മനോജ് തിവാരി (നോര്ത്ത് ഈസ്റ്റ് ദല്ഹി), ബണ്ടി സഞ്ജയ് കുമാര് (കരീം നഗര്), സി.പി. ജോഷി (ചിറ്റോര്ഗഡ്), സി.ആര്. പാട്ടീല് (നവസാരി), എറ്റേല രാജേന്ദര് (മല്കജ്ഗിരി) എന്നിവരും ആദ്യ പട്ടികയിലുണ്ട്.
മുന് കേന്ദ്രവിദേശകാര്യമന്ത്രിയും മുതിര്ന്ന ബിജെപി നേതാവുമായിരുന്ന സുഷമസ്വരാജിന്റെ മകള് ബന്സുരി സ്വരാജ് (ന്യൂദല്ഹി) സ്ഥാനാര്ത്ഥി പട്ടികയിലെ പുതുമുഖങ്ങളിലൊരാളാണ്. ബിജെപി ദേശീയ സെക്രട്ടറിയും ദേശീയ വക്താവുമായ അനില് കെ. ആന്റണി(പത്തനംതിട്ട)യും പട്ടികയിലെ പുതുമുഖമാണ്. വിവിധ പാര്ട്ടികളില് നിന്ന് രാജിവെച്ച് ഈയിടെ ബിജെപിയില് ചേര്ന്ന ബി.ബി. പാട്ടീല് (സാഹിറാബാദ്), റിതേഷ് പാണ്ഡെ (അംബേദ്കര് നഗര്), ഗീത കോഡ(സിങ്ഭൂം) എന്നിവരും ആദ്യപട്ടികയില് തന്നെ ഇടം നേടി.
പ്രതികരിക്കാൻ ഇവിടെ എഴുതുക: