തിരുവനന്തപുരം : സംസ്ഥാനത്ത് 32 നദികളില് സാന്ഡ് ഓഡിറ്റിങ് നടത്തിയെന്നും മണല് വാരല് ഉടന് പുനരാരംഭിക്കുമെന്നും റവന്യു മന്ത്രി കെ രാജന്. എട്ട് ജില്ലകളില് ഖനന സ്ഥലങ്ങള് കണ്ടെത്തി.ആദ്യ അനുമതി മലപ്പുറത്താണ് നല്കിയത്. ഇവിടത്തെ ഭാരതപ്പുഴ,കടലുണ്ടി ചാലിയാര് പുഴകളില് മാര്ച്ച് അവസാനത്തോടെ ഖനനം തുടങ്ങും.
8 ജില്ലകളിലായി ഒന്നേമുക്കാല് കോടിയോളം മെട്രിക് ടണ് മണല് ഖനനം ചെയ്യാമെന്നാണ് സാന്ഡ് ഓഡിറ്റിംഗില് കണ്ടെത്തിയത്. കൊല്ലം, തൃശൂര്, മലപ്പുറം, പാലക്കാട്, കണ്ണൂര്, കാസര്കോട്, പത്തനംതിട്ട, എറണാകുളം ജില്ലകളിലാണ് മണല് ഖനന സാദ്ധ്യതയുള്ള നദികളെന്ന് സാന്ഡ് ഓഡിറ്റിംഗില് കണ്ടെത്തി.
കോഴിക്കോട്, ഇടുക്കി, കോട്ടയം ജില്ലകളിലെ നദികളില് മണല്വാരലിന് സാദ്ധ്യതയില്ല.
കളക്ടറുടെ അദ്ധ്യക്ഷതയിലുളള ജില്ലാതല സമിതികളില് പരിസ്ഥിതി, തൊഴിലാളി സംഘടനാ പ്രതിനിധികള്, തദ്ദേശസ്ഥാപന പ്രതിനിധികള് എന്നിവര് അംഗങ്ങളാവും.ജില്ലാസമിതിക്ക് കീഴില് ഓരോ നദികളുമായും ബന്ധപ്പെട്ട് തദ്ദേശ സ്ഥാപന അദ്ധ്യക്ഷന്റെ അധ്യക്ഷതയിലുളള കടവ് കമ്മിറ്റികള്ക്കാണ് മണല്വാരി ലേലം ചെയ്യാനുള്ള ചുമതല.
