കരിമ്പിന്റെ ന്യായവില ഉയർത്തി കേന്ദ്രസർക്കാർ. ക്വിന്റലിന് 340 രൂപയാണ് ഉയർത്തിയിരിക്കുന്നത്. പ്രധാനമന്ത്രി നരേന്ദ്രമോദിയുടെ അദ്ധ്യക്ഷതയിൽ ചേർന്ന മന്ത്രിസഭാ യോഗത്തിലാണ് തീരുമാനം. 2023-24 സീസണിലെ കരിമ്പിന്റെ എഫ്ആർപിയേക്കാൾ 8% കൂടുതലാണ്. പുതുക്കിയ നിരക്ക് ഈ വർഷം ഒക്ടോബർ മുതൽ പ്രാബല്യത്തിൽ വരും. ഇതോടെ പഞ്ചസാര മില്ലുകൾ 10.25% വീണ്ടെടുക്കുമ്പോൾ കരിമ്പിന് ക്വിന്റലിന് 340 രൂപ ന്യായ വില ആയി നൽകുമെന്ന് തീരുമാനമായി.
കൂടാതെ സ്ത്രീ സുരക്ഷയ്ക്കായുള്ള പദ്ധതി 2025-26-വരെ തുടരുന്നതിനും കേന്ദ്രമന്ത്രിസഭാ യോഗത്തിൽ തീരുമാനിച്ചു. 1,179.72 കോടി രൂപയുടെ പദ്ധതിയ്ക്ക് 885.49 കോടി രൂപ കേന്ദ്ര ആഭ്യന്തരമന്ത്രാലയവും 294.23 കോടി രൂപ നിർഭയ ഫണ്ടിൽ നിന്നും നൽകുമെന്ന് യോഗത്തിൽ തീരുമാനിച്ചു. ബഹിരാകാശ രംഗത്ത് സാറ്റലൈറ്റുകൾ, വിക്ഷേപണവാഹനങ്ങൾ, അനുബന്ധ സംവിധാനങ്ങൾ, വിക്ഷേപണത്തിന് സ്പേയ്സ് പോർട്ട് എന്നിവയിൽ നൂറ് ശതമാനം വരെ നിക്ഷേപത്തിനും കേന്ദ്ര മന്ത്രിസഭയിൽ നിന്നും അംഗീകാരം ലഭിച്ചു.
