തിരുവനന്തപുരം: കുളത്തില്‍ വീണ് നാല് വയസുകാരന്‍ മരിച്ചു. കല്ലറ – ഇരുളൂര്‍ രതീഷ് ഭവനില്‍ സതിരാജിന്റെ മകന്‍ ആദിത്യനാണ് (4) മരിച്ചത്.ഞായറാഴ്ച ഉച്ചയ്‌ക്കാണ് സംഭവം.
വീടിന് സമീപമുളള കുളത്തിലാണ് കുട്ടി വീണത്. കുളത്തില്‍ അമ്മ തുണി കഴുകവെ സമീപം കുട്ടിയും ഉണ്ടായിരുന്നു. തുണി കഴുകിയ ശേഷം വീട്ടിലേക്ക് തിരികെ പോയെങ്കിലും വഴിയില്‍ വച്ച് കുട്ടി വീണ്ടും തിരിച്ച് പോയി എന്നാണ് പറയുന്നത്.
തുണിവിരിച്ച ശേഷം കുട്ടിയെ കാണാതായതോടെ പരിഭ്രാന്തിയിലായ അമ്മ നോക്കിയപ്പോള്‍ കുട്ടി കുളത്തില്‍ മുങ്ങിത്താഴുന്നതാണ് കണ്ടത്. അമ്മയുടെ നിലവിളി കേട്ട് നാട്ടുകാര്‍ ഓടി എത്തി കുട്ടിയെ സമീപത്തെ സ്വകാര്യ ആശുപത്രിയില്‍ എത്തിച്ചു. പ്രാഥമിക ചികിത്സയ്‌ക്ക് ശേഷം സ്വകാര്യ മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.
