കാസര്‍കോട്: കേരള കേന്ദ്ര സര്‍വകലാശാലയുടെ പുതിയ ഭരണനിര്‍വഹണ ആസ്ഥാന മന്ദിരം പ്രധാനമന്ത്രി നരേന്ദ്ര മോദി 20ന് ഉദ്ഘാടനം ചെയ്യും. ഭരണഘടനാ ശില്‍പി ഡോ.ബി.ആര്‍. അംബേദ്കറുടെ പേരിലുള്ള മന്ദിരം ഓണ്‍ലൈനായാണ് പ്രധാനമന്ത്രി ഉദ്ഘാടനം ചെയ്യുകയെന്ന് വൈസ് ചാന്‍്‌സലര്‍ ഇന്‍ ചാര്‍ജ്ജ് പ്രൊഫ.കെ.സി. ബൈജു വാര്‍ത്താസമ്മേളനത്തില്‍ അറിയിച്ചു.
22 സംസ്ഥാനങ്ങളിലെ 37 ഉന്നത വിദ്യാഭ്യാസ സ്ഥാപനങ്ങളുടെ 12,744 കോടി രൂപയുടെ പദ്ധതികള്‍ പ്രധാനമന്ത്രി ഉദ്ഘാടനം ചെയ്യും. ഇതില്‍ കേരളത്തില്‍ കേരള കേന്ദ്ര സര്‍വകലാശാലയുടെ പദ്ധതി മാത്രമാണുള്ളത്.
ജമ്മുവില്‍ പ്രധാനമന്ത്രി പങ്കെടുക്കുന്ന ചടങ്ങിന് പുറമെ കേരള കേന്ദ്ര സര്‍വകലാശാലയിലും പരിപാടി സംഘടിപ്പിച്ചിട്ടുണ്ട്. പെരിയ കാമ്പസില്‍ പുതിയ മന്ദിരത്തിന് മുന്നില്‍ പ്രത്യേകം തയാറാക്കിയ വേദിയില്‍ നടക്കുന്ന പരിപാടിയില്‍ ഗവര്‍ണര്‍ ആരിഫ് മുഹമ്മദ് ഖാന്‍, രാജ്‌മോഹന്‍ ഉണ്ണിത്താന്‍ എംപി, സി.എച്ച്. കുഞ്ഞമ്പു എംഎല്‍എ തുടങ്ങിയവര്‍ സംബന്ധിക്കും.
മൂന്ന് നിലകളിലായി 68,200 സ്‌ക്വയല്‍ ഫീറ്റില്‍ 38.16 കോടി രൂപ ചെലവിലാണ് ഡോ.ബി.ആര്‍. അംബേദ്കര്‍ ഭവന്‍ നിര്‍മിച്ചിരിക്കുന്നത്. കേന്ദ്ര വിദ്യാഭ്യാസ മന്ത്രാലയത്തിന്റെ ഹെഫ (ഹയര്‍ എഡ്യൂക്കേഷന്‍ ഫിനാന്‍സിങ് ഏജന്‍സി) സ്‌കീമില്‍ ഉള്‍പ്പെടുത്തിയാണ് തുക അനുവദിച്ചത്. ഭരണനിര്‍വഹണവുമായി ബന്ധപ്പെട്ട മുഴുവന്‍ വിഭാഗങ്ങളും പുതിയ മന്ദിരത്തിലേക്ക് മാറും. ആദ്യ നിലയിലാണ് വൈസ് ചാന്‍സലറുടെ കാര്യാലയം. രജിസ്ട്രാര്‍, പരീക്ഷാ കണ്‍ട്രോളര്‍, ഫിനാന്‍സ് ഓഫീസര്‍ എന്നീ സ്റ്റാറ്റിയൂട്ടറി ഓഫീസര്‍മാരുടെ ഓഫീസുകള്‍, അക്കാദമിക്, അഡ്മിനിസ്‌ട്രേറ്റീവ്, ഫിനാന്‍സ്, എക്‌സാം, പര്‍ച്ചേസ് തുടങ്ങി വിവിധ സെക്ഷനുകളും മന്ദിരത്തില്‍ പ്രവര്‍ത്തിക്കും. ദിവ്യാംഗ സൗഹൃദമാണ് കെട്ടിടം. ലിഫ്റ്റ്, വൈഫൈ, പാര്‍ക്കിങ് സൗകര്യം എന്നിവയുമുണ്ട്.
പുതിയ ഭരണനിര്‍ഹണ ആസ്ഥാന മന്ദിരം ഉദ്ഘാടനം ചെയ്യുന്നതോടെ അടിസ്ഥാന സൗകര്യ വികസനത്തില്‍ വലിയ മുന്നേറ്റമാണ് സര്‍വകലാശാല നടത്തുന്നത്. സംസ്ഥാനത്ത് ആദ്യമായി ഇന്റഗ്രേറ്റഡ് ടീച്ചര്‍ എഡ്യൂക്കേഷന്‍ പ്രോഗ്രാം (ഐടിഇപി) സര്‍വകലാശാല ആരംഭിച്ചിരുന്നു. നാല് വര്‍ഷ ബിരുദ കോഴ്‌സുകള്‍ ആരംഭിക്കാനുള്ള മുന്നൊരുക്കത്തിലുമാണ്.
35 കോടി രൂപ ചെലവില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കുമുള്ള ഹോസ്റ്റലിന്റെ നിര്‍മാണം പുരോഗമിക്കുകയാണ്. നിലവില്‍ എട്ട് ഹോസ്റ്റലുകളുണ്ട്. 19 കോടി രൂപ ചെലവഴിച്ചുള്ള ലൈബ്രറി കെട്ടിടത്തിന്റെ നിര്‍മാണവും അവസാന ഘട്ടത്തിലാണ്. രജിസ്ട്രാര്‍ ഡോ.എം. മുരളീധരന്‍ നമ്പ്യാര്‍, ഡീന്‍ അക്കാദമിക് പ്രൊഫ. അമൃത് ജി. കുമാര്‍, പബ്ലിസിറ്റി ആന്റ് മീഡിയ കമ്മിറ്റി ചെയര്‍മാന്‍ പ്രൊഫ. സജി. ടി.ജി, പബ്ലിക് റിലേഷന്‍സ് ഓഫീസര്‍ കെ. സുജിത് എന്നിവരും വാര്‍ത്താസമ്മേളനത്തില്‍ പങ്കെടുത്തു.
