ഇടുക്കി : തൊടുപുഴ ലീഗല്‍ മെട്രോളജി സഹകരണ സംഘത്തില്‍ യുവാവിന്റെ അക്രമം. ചിട്ടിപ്പണം ആവശ്യപ്പെട്ട് മുട്ടം സ്വദേശി പ്രസാദ് ബാങ്കിനുള്ളില്‍ പെട്രോളൊഴിച്ചു.
പൊലീസെത്തി യുവാവിനെ കസ്റ്റഡിയിലെടുത്തു. പെട്രോളും പടക്കവുമായി എത്തി ഒരുമണിക്കൂറോളം ഇയാള്‍ ഭീകരാന്തരീക്ഷം സൃഷ്ടിച്ചു.
പ്രസാദിന് ബാങ്കില്‍ അഞ്ച് ലക്ഷം രൂപയുടെ ചിട്ടിയുണ്ട്. ചിട്ടിയുടെ അടച്ച പണം തിരികെ കിട്ടണമെന്ന് ആവശ്യപ്പെട്ട് ഇയാള്‍ ഇന്നലെ ബാങ്കില്‍ എത്തി. എന്നാല്‍ ഇതിന് അഡ്മിനിസ്‌ട്രേറ്റിവ് ബോഡിയുടെ അനുമതി വേണമെന്ന് മാനേജര്‍ മറുപടി നല്‍കി.
രോഷാകുലനായി മടങ്ങിയ പ്രസാദ് ഇന്ന് രാവിലെ ബാങ്കിലെത്തി കയ്യില്‍ കരുതിയിരുന്ന പെട്രോള്‍ ബാങ്കിലും ദേഹത്തുമായായി ഒഴിച്ചു. കൈവശം ഒരു പടക്കവും ഉണ്ടായിരുന്നു. ഇത് കത്തിക്കുമെന്നും ഭീഷണിപ്പെടുത്തി ബഹളം വച്ചു. ഇതിനിടെ പൊലീസും അഗ്നിശമനസേനയും എത്തി യുവാവിനെ കീഴ്‌പ്പെടുത്തി.
