തിരുവനന്തപുരം : രഞ്ജി ട്രോഫിയില്‍ ബംഗാളിനെതിരെ വമ്പന്‍ വിജയം നേടി കേരളം.സഞ്ജു സാംസണ്‍ നായകനായ കേരളം 109 റണ്‍സിന്റെ വിജയമാണ് നേടിയത്.
449 റണ്‍സ് വിജയ ലക്ഷ്യവുമായി ഇറങ്ങിയ ബംഗാള്‍ രണ്ടാം ഇന്നിംഗ്‌സില്‍ 339 റണ്‍സിന് എല്ലാവരും പുറത്തായി.ബംഗാളിന് വേണ്ടി ഷഹബാസ് 100 പന്തില്‍ 80 റണ്‍സെടുത്തു . അഭിമന്യു ഈശ്വരന്‍ അര്‍ധ സെഞ്ചറി 65 റണ്‍സ് നേടി.
കരണ്‍ ലാല്‍ (40), സുദീപ് കുമാര്‍ ഗരാമി ( 31), മനോജ് തിവാരി ( 35) എന്നിവരാണ് രണ്ടാം ഇന്നിംഗ്‌സില്‍ ബംഗാളിന്റെ മറ്റു പ്രധാന സ്‌കോറര്‍മാര്‍. കേരളത്തിന് വേണ്ടി ആദ്യ ഇന്നിംഗ്‌സില്‍ 9 വിക്കറ്റുകള്‍ വീഴ്‌ത്തിയ ജലജ് സക്‌സേന രണ്ടാം ഇന്നിംഗ്‌സില്‍ നാലു വിക്കറ്റെടുത്തു. ശ്രേയസ് ഗോപാലും ബേസില്‍ തമ്പിയും കേരളത്തിനായി രണ്ടു വിക്കറ്റുകള്‍ വീതം നേടി.
നാലാം ദിവസം സ്റ്റമ്പെടുക്കുമ്പോള്‍ ബംഗാള്‍ 2ന് 77 റണ്‍സ് എന്ന നിലയിലായിരുന്നു. തിങ്കളാഴ്ച 262 റണ്‍സ് വഴങ്ങി കേരളം ബാക്കിയുളള എട്ട് വിക്കറ്റുകള്‍ കൂടി വീഴ്‌ത്തി.
കേരളം രണ്ടാം ഇന്നിംഗ്‌സില്‍ 6ന് 265 റണ്‍സിന് ഡിക്ലയര്‍ ചെയ്തിരുന്നു. സച്ചിന്‍ ബേബി (51),രോഹന്‍ കുന്നുമ്മല്‍ (51), ശ്രേയസ് ഗോപാല്‍ (50) എന്നിവര്‍ കേരളത്തിനായി അര്‍ധ സെഞ്ചറി നേടി.
സ്‌കോര്‍: കേരളം: 363, 6ന് 265 ഡിക്ലയേഡ്. ബംഗാള്‍: 180, 339
