വയനാട്: മാനന്തവാടിയില്‍ കാട്ടാനയുടെ ആക്രമണത്തില്‍ ഒരാള്‍ കൊല്ലപ്പെട്ടതില്‍ പ്രതിഷേധം കടുപ്പിച്ച് നാട്ടുകാര്‍. റോഡുകൾ ഉപരോധിച്ചുകൊണ്ടായിരുന്നു നാട്ടുക്കാരുടെ പ്രതിഷേധം. പ്രതിഷേധക്കാർ എംഎൽഎയെ തടയുകയും എസ് പിക്കെതിരെ ഗോബാക്ക് മുദ്രാവാക്യം വിളിക്കുകയും ചെയ്തു. കാട്ടാന ആക്രമണത്തിൽ കൊല്ലപ്പെട്ട അജീഷിന്റെ മൃതദേഹവുമായിട്ടായിരുന്നു നാട്ടുകാരുടെ പ്രതിഷേധം.
മാനന്തവാടിയിൽ കടകൾ അടച്ചും നാട്ടുകാർ പ്രതിഷേധിക്കുന്നുണ്ട്. മാനന്തവാടിയിലേക്കുള്ള എല്ലാ റോഡുകൾ ഉപരോധിച്ചുകൊണ്ടാണ് പ്രതിഷേധം. ഇതിനിടെയാണ് കല്‍പ്പറ്റയിൽ നിന്നും മാനന്തവാടി മെഡിക്കല്‍ കോളജ് ആശുപത്രിയിലേക്ക് എത്തിയ എസ്.പി ടി. നാരായണനെ നാട്ടുകാര്‍ തടഞ്ഞത്. കോയിലേരി റോഡില്‍ വള്ളിയൂര്‍കാവ് ജംഗ്ഷനില്‍വച്ചാണ് എസ്.പിയുടെ വാഹനം നാട്ടുകാര്‍ തടഞ്ഞത്.
എസ്.പിയാണെങ്കിലും ആരാണെങ്കിലും വാഹനം കടത്തിവിടില്ലെന്നും ആശുപത്രിയിലേക്ക് നടന്നുപോകണമെന്നും പ്രതിഷേധക്കാര്‍ ആവശ്യപ്പെട്ടു. ഇതോടെ എസ്.പിയുടെ സുരക്ഷ ഉദ്യോഗസ്ഥര്‍ പ്രതിഷേധക്കാരെ മാറ്റാന്‍ ശ്രമിച്ചെങ്കിലും അദ്ദേഹം വാഹനത്തില്‍നിന്നും ഇറങ്ങി ആശുപത്രിയിലേക്ക് നടന്നു. ആശുപത്രിയില്‍നിന്നും ഒന്നര കിലോമീറ്റര്‍ ദൂരെയാണ് വാഹനം തടഞ്ഞത്.
എസ്.പി നടന്നുപോകുന്നതിനിടയിലും പലയിടത്തും നാട്ടുകാര്‍ പ്രതിഷേധിച്ചു. എസ്പി ‘ഗോ ബാക്ക്’ മുദ്രാവാക്യവും നാട്ടുകാര്‍ വിളിച്ചു. വലിയ പ്രതിഷേധത്തിനാണ് മാനന്തവാടി സാക്ഷ്യം വഹിക്കുന്നത്. മാനന്തവാടി ടൗണ്‍ നിശ്ചലാവസ്ഥയിലാണ്.
