കൊല്ക്കത്ത: ബംഗാളിലെ ജയിലുകളില് വനിതാ തടവുകാര് ഗര്ഭിണികളാവുകയും പ്രസവിക്കുകയും ചെയ്യുന്നുവെന്ന് ഞെട്ടിപ്പിക്കുന്ന റിപ്പോര്ട്ട്. സംസ്ഥാനത്തെ വിവിധ ജയിലുകളിലായി 196 സ്ത്രീകള് പ്രസവിച്ചതായി അമിക്കസ് ക്യൂറി റിപ്പോര്ട്ട് ചെയ്യുന്നു. ജയില് പരിഷ്കരണവുമായി ബന്ധപ്പെട്ട് അമിക്കസ് ക്യൂറി തയ്യാറാക്കിയ റിപ്പോര്ട്ടിലാണ് ഇക്കാര്യമുള്ളത്. യാതൊരുവിധ മെഡിക്കല് സൗകര്യങ്ങളോ സുരക്ഷയോ ഇല്ലാതെയാണ് വനിതാ തടവുകാര് പ്രസവിക്കുന്നതെന്നും റിപ്പോര്ട്ടില് വ്യക്തമാക്കുന്നു.
സംഭവം കൊല്ക്കത്ത ഹൈക്കോടതി ചീഫ് ജസ്റ്റിസ് ജസ്റ്റിസ് ടി.എസ്. ശിവജ്ഞാനം, ജസ്റ്റിസ് സുപ്രതിം ഭട്ടാചാര്യ എന്നിവരടങ്ങിയ ഡിവിഷന് ബെഞ്ച് വളരെ ഗൗരവമായി വീക്ഷിക്കുകയും ക്രിമിനല് കേസുകള് പരിഗണിക്കുന്ന ഡിവിഷന് ബെഞ്ചിന് മുമ്പാകെ സമര്പ്പിക്കുമെന്ന് അറിയിക്കുകയും ചെയ്തു.
വനിതാ തടവുക്കാരെ പാര്പ്പിച്ചിരിക്കുന്നിടങ്ങളില് പുരുഷ ജീവനക്കാരെ നിരോധിക്കണമെന്ന് അമിക്കസ് ക്യൂറി നിര്ദേശിച്ചു. വനിതാ തടവുകാരുമായി സംസാരിച്ചാണ് റിപ്പോര്ട്ട് തയ്യാറാക്കിയിരിക്കുന്നത്. അടുത്തിടെ ഒരു വനിതാ ജയില് സന്ദര്ശിച്ചപ്പോള് ഒരു ഗര്ഭിണിയെയും 15 കുഞ്ഞുങ്ങളെയും കണ്ടതായും ഇതില് 10 ആണ്കുട്ടികളും അഞ്ച് പെണ്കുട്ടികളുമാണെന്നും ഇവരെല്ലാം ജനിച്ചത് ജയിലിലാണെന്നും റിപ്പോര്ട്ടില് പറയുന്നു. ജില്ലാ ജഡ്ജിമാര് അവരുടെ അധികാര പരിധിയിലുള്ള ജയിലുകള് സന്ദര്ശിക്കുകയും റിപ്പോര്ട്ട് തയാറാക്കുകയും ചെയ്യണമെന്നും അമിക്കസ് ക്യൂറി നിര്ദേശിക്കുന്നു.
