മൂന്നാര്‍: തമിഴ്‌നാട് സ്വദേശിനിയായ 17കാരിയെ വിവാഹം ചെയ്ത് ഗര്‍ഭിണിയാക്കിയ സംഭവത്തില്‍ യുവാവ് അറസ്റ്റില്‍. പ്രതിയുടേയും പെണ്‍കുട്ടിയുടേയും രക്ഷിതാക്കള്‍ക്കെതിരേയും മൂന്നാര്‍ പോലീസ് കേസെടുത്തു.
കെഡിഎച്ച്പി കമ്പനി കടലാര്‍ എസ്റ്റേറ്റ് ഈസ്റ്റ് ഡിവിഷനില്‍ എല്‍. രതീഷിനെയാണ് (27) മൂന്നാര്‍ പോലീസ് അറസ്റ്റ് ചെയ്തത്. രതീഷിന്റെ പിതാവ് ലിംഗം (48), മാതാവ് പൊന്നമ്മാള്‍ (45), തമിഴ്‌നാട് ശ്രീവല്ലിപുത്തൂര്‍ വിരുദനഗര്‍ സ്വദേശിയായ പെണ്‍കുട്ടിയുടെ മാതാപിതാക്കള്‍ എന്നിവര്‍ക്കെതിരെയാണ് കേസെടുത്തത്. തമിഴ്‌നാട് കടലാറിലുള്ള പാര്‍വതി അമ്മന്‍ കോവിലില്‍ വച്ച് 2023 ഒക്ടോബര്‍ 27നായിരുന്നു വിവാഹം.
വയറുവേദനയെ തുടര്‍ന്ന് പെണ്‍കുട്ടിയെ മൂന്നാറിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. തുടര്‍ന്ന് നടത്തിയ പരിശോധനയിലാണ് ഗര്‍ഭിണിയാണെന്ന് കണ്ടെത്തിയത്. ആശുപത്രി അധികൃതര്‍ നല്കിയ വിവരത്തെ തുടര്‍ന്ന് മൂന്നാര്‍ എസ്എച്ച്ഒ രാജന്‍ കെ. അരമനയുടെ നേതൃത്വത്തിലാണ് പ്രതിയെ പിടികൂടിയത്. പോലീസ് പെണ്‍കുട്ടിയെ ചൈല്‍ഡ് വെല്‍ഫെയര്‍ കമ്മിറ്റി മുമ്പാകെ ഹാജരാക്കി. പ്രതി ദേവികുളം കോടതിയില്‍ ഹാജരാക്കി. രതീഷിനെതിരെ പോക്‌സോ നിയമ പ്രകാരവും ബലാത്സംഗ കുറ്റത്തിനും കേസെടുത്തിട്ടുണ്ട്.
