ഹൈദ്രാബാദ്: അരിവില കൂടിയ സാഹചര്യത്തില് തെലങ്കാനയില് നിന്ന് അരി എത്തിക്കാന് സര്ക്കാര് ഒരുങ്ങുന്നു.ഭക്ഷ്യ മന്ത്രി ജി ആര് അനില് തെലങ്കാന ഭക്ഷ്യമന്ത്രി ഉത്തംകുമാര് റെഡ്ഢിയുമായി ചര്ച്ച നടത്തി. അരിയും മുളകും എത്തിക്കാന് ധാരണ ആയെന്ന് ജി ആര് അനില് അറിയിച്ചു.
ഹൈദരാബാദില് വച്ചായിരുന്നു മന്ത്രിമാരുടെ ചര്ച്ച. സപ്ലൈകോ ഉദ്യോഗസ്ഥരും തെലങ്കാന സിവില് സപ്ലൈസ് ഉദ്യോഗസ്ഥരുമായി തുടര് ചര്ച്ച നടക്കും. വിപണിയിലേതിനെക്കാള് കുറഞ്ഞ വിലയില് സാധനങ്ങള് നല്കുമെന്ന് തെലങ്കാന അറിയിച്ചെന്നും മന്ത്രി ജി ആര് അനില് പറഞ്ഞു.
അരി കയറ്റുമതി ഏറിയതും കൂടുതല് വില കിട്ടുന്ന അരി ഇനങ്ങളുടെ കൃഷിയിലേക്ക് കര്ഷകര് മാറിയതുമൊക്കെയാണ് വില ഉയരാന് കാരണം. കേരളത്തിലേക്ക് പ്രധാനമായും അരിയെത്തുന്നത് ആന്ധ്ര,തമിഴ്നാട്,പശ്ചിമ ബംഗാള് തുടങ്ങിയ സംസ്ഥാനങ്ങളില് നിന്നാണ്.
