കൊല്ലം: ബിരിയാണിക്ക് വില കുതിച്ചുയര്ന്നു. ഹോട്ടലുകളില് കച്ചവടം കുറഞ്ഞു. ഉത്പാദനം നിര്ത്തി കച്ചവടക്കാര്. അരിക്കും കോഴിക്കും ഉള്പ്പെടെ അവശ്യവസ്തുക്കള്ക്കുള്ള വില ഉയര്ന്നതോടെയാണ് ബിരിയാണിക്ക് വില ഉയര്ത്താന് കച്ചവടക്കാര് നിര്ബന്ധിതരായത്.
ബിരിയാണിക്കുള്ള സകലസാധനങ്ങള്ക്കും മൂന്നുമാസത്തിനിടെ നാല്പത് ശതമാനത്തോളമാണ് വിലക്കയറ്റം ഉണ്ടായത്. പിടിച്ചുനില്ക്കാനാവാതെ കാറ്ററിങ് യൂണിറ്റുകള് ഇരുപത് ശതമാനം വില വര്ധിപ്പിച്ചിരിക്കുന്നത്. ഒരു വര്ഷത്തിനിടെ ഒന്നാം നിര ബ്രാന്ഡ് ബിരിയാണി അരിക്ക് 200 മുതല് 215 രൂപ വരെയായി. വിവിധ ബ്രാന്ഡുകളുടെ അരി കിലോയ്ക്ക് 95-100 രൂപ വിലയില് ലഭിച്ചിരുന്നു. എന്നാല് ഇപ്പോള് 150 രൂപ മുതലാണു വില. ഒരു വര്ഷം മുന്പ് ഇത് 130- 140 രൂപയായിരുന്നു.
കോഴി വില 110ല് നിന്ന് 190 രൂപയായി. ജീവനുള്ള കോഴിയുടെ വില കിലോയ്ക്ക് 175 രൂപ മുതലാണ്. പാചകവാതകത്തിന് സിലിണ്ടറിന് വില കൂടിയും കുറഞ്ഞും നില്ക്കുന്നു. ഒരു പിക്കപ്പ് വാന് വിറകിന് 5,500-6,000 രൂപ വരെയുണ്ടായിരുന്നത് 1500 രൂപയോളം കൂടി. കോഴിമുട്ടയ്ക്കും വില കൂടി. വലിയ ഉള്ളിക്ക് കിലോയ്ക്ക് 38 രൂപയാണു വില. ഇഞ്ചിയുടെ വില 220 രൂപയായി. വെളുത്തുള്ളിയുടെ ഉയര്ന്ന വില ഇനിയും കുറഞ്ഞിട്ടില്ല. പാലിനു വില വര്ധിപ്പിച്ചപ്പോള് നെയ്യിന്റെയും തൈരിന്റെയും വില കൂടിയത് അമിത ഭാരമായി.
വെളുത്തുള്ളി, തൈര്, നെയ്യ് തുടങ്ങി ബിരിയാണിയുടെ എല്ലാ ചേരുവള്ക്കും കാര്യമായ വിലക്കയറ്റമുണ്ട്. മുട്ടയ്ക്ക് എട്ടുരൂപയായി മുട്ടയുടെ വില കയറിയതിനൊപ്പം ക്ഷാമവുമുണ്ട്. തമിഴ്നാട്ടില് നിന്നും മൃഗങ്ങളുടെ വരവ് കുറഞ്ഞതോടെ പോത്തിറച്ചിയ്ക്ക് കടുത്ത ക്ഷാമവും വിലക്കയറ്റവുമാണ്. നല്ല പോത്തിറച്ചിയ്ക്ക് 480 മുതല് 500 രൂപവരെയാണ് വില. മൂന്നുമാസം മുമ്പ് 360 മുതല് 400 രൂപ വരെയായിരുന്നു. മട്ടനും മീനിനുമെല്ലാം സമാനമായ രീതിയില് വില വര്ധിച്ചു.
പാചകവാതക വില വര്ധനക്കുപിന്നാലെ ഹോട്ടലുകള് നേരത്തെ ബിരിയാണി വില വര്ധിപ്പിച്ചിരുന്നു. ഈ മാസം മുതലാണ് കാറ്ററിങ് യൂണിറ്റുകള് വില കൂട്ടിയത്. പരിപാടികള്ക്കും മറ്റ് പാര്ടികളിലും വൃത്തിയായി ബിരിയാണി വിളമ്പണമെങ്കില് 220 രൂപയെങ്കിലും വാങ്ങേണ്ടിവരും. അതല്ലെങ്കില് ഗുണനിലവാരത്തില് കണ്ണടക്കേണ്ടി വരും എന്നാണ് കച്ചവടക്കാര് സൂചിപ്പിക്കുന്നത്.
