ഇരിട്ടി: ആറളം, കൊട്ടിയൂര്‍ വന്യജീവിസങ്കേതങ്ങളില്‍ നടത്തിയ വാര്‍ഷിക ചിത്ര ശലഭ സര്‍വ്വെയില്‍ രണ്ടിനം പുതിയ ശലഭങ്ങളെക്കൂടി മേഖലയില്‍ കണ്ടെത്തി. ശ്യാമരത്നനീലി, ചീനപ്പൊട്ടല്‍ എന്നീ ശലഭങ്ങളെയാണ് പുതുതായി കണ്ടെത്തിയത്.
ഇതോടെ മേഖലയില്‍ 266 ഇനം ശലഭങ്ങള്‍ വനത്തിനുള്ളില്‍ നിരീക്ഷിച്ചു. മൂന്ന് ദിവസമായി നടന്ന സര്‍വ്വെയില്‍ അപൂര്‍വ്വ ശലഭങ്ങളായ ഗോമേതകശലഭം, നീല നവാബ്, ചിത്രാംഗദന്‍ എന്നിവയുടെ മുട്ടയിടല്‍ നിരീക്ഷിച്ചു. ആറളത്തെ സഞ്ചാരികളെ ഏറെയാകര്‍ഷിക്കാറുള്ള ആല്‍ബട്രോസ് ശലഭങ്ങളുടെ ദേശാടനവും ചെളിയൂറ്റല്‍ കൂട്ടംചേരലും ഈ സര്‍വ്വേയില്‍ പതിവിലും കുറവായിരുന്നു. ചീങ്കണ്ണിപ്പുഴയോരത്തെ മണല്‍ തിട്ടകളുടെ ശോഷണം ദേശാടന ശലഭങ്ങള്‍ക്കാവശ്യമായ ലവണങ്ങളുടെ ലഭ്യതയെ ബാധിക്കുന്നതിനെക്കുറിച്ച് സര്‍വ്വേയില്‍ പങ്കെടുത്ത ശലഭനിരീക്ഷകര്‍ ആശങ്ക പങ്കുവെച്ചു.
ആറളം വന്യജീവി സങ്കേതംഅസി. വൈല്‍ഡ്ലൈഫ് വാര്‍ഡന്‍ പി.പ്രസാദിന്റെ അധ്യക്ഷതയില്‍ വൈല്‍ഡ്ലൈഫ് വാര്‍ഡന്‍ ജി. പ്രദീപ് സര്‍വ്വെഉദ്ഘാടനം ചെയ്തു.
സെക്ഷന്‍ ഫോറസ്റ്റ് ഓഫീസര്‍ കെ.രാജു, എം.എ. യദുമോന്‍, പ്രശസ്ത ശലഭ നിരീക്ഷകരായ വി.സി. ബാലകൃഷ്ണന്‍, സമ്മിലന്‍ ഷെട്ടി എന്നിവര്‍സംസാരിച്ചു. ശലഭ നിരീക്ഷകരായ പി.കെ. ഗിരീഷ് മോഹന്‍, വി.സി. ബാലകൃഷ്ണന്‍, വി.കെ. ചന്ദ്രശേഖരന്‍ എന്നിവര്‍ ക്ലാസെടുത്തു. മലബാര്‍ നാച്ചുറല്‍ ഹിസ്റ്ററി സൊസൈറ്റിയുടെ സഹകരണത്തോടെ നടത്തിയ സര്‍വ്വേയില്‍ കേരളത്തിനകത്തും പുറത്തു നിന്നുമായി 60 ഓളം ചിത്രശലഭ നിരീക്ഷകര്‍ പങ്കെടുത്തു
