മെല്ബണ്: മൂന്നാം സീഡ് ഡാനില് മെദ്വദേവ്, ആറാം സീഡ് അലക്സാണ്ടര് സ്വരേവ് എന്നിവര് ഓസ്ട്രേലിയന് ഓപ്പണ് ടെന്നീസിന്റെ പുരുഷ സിംഗിള്സ് സെമിയില്.
ക്വാര്ട്ടറില് റഷ്യന് താരം മെദ്വദേവ് ഒന്പതാം സീഡ് പോളണ്ടിന്റെ ഹ്യുബര്ട്ട് ഹുര്കാസിനെ അഞ്ച് സെറ്റ് നീണ്ട വാശിയേറിയ പോരാട്ടത്തിനൊടുവില് കീഴടക്കിയാണ് അവസാന നാലില് ഇടംപിടിച്ചത്. നാല് മണിക്കൂര് നീണ്ട പോരാട്ടത്തിനൊടുവിലാണ് മെദ്വദേവിന്റെ വിജയം. സ്കോര്: 7-6 (7-2), 2-6, 6-3, 5-7, 6-4. മൂന്നാം തവണയാണ് മെദ്വദേവ് ഓസ്ട്രേലിയന് ഓപ്പണിന്റെ സെമിയില് കളിക്കുന്നത്. കഴിഞ്ഞ വര്ഷം മൂന്നാം റൗണ്ടില് താരം പുറത്തായിരുന്നു.
രണ്ടാം സീഡ് സ്പാനിഷ് താരം കാര്ലോസ് അല്കാരസിനെ നാല് സെറ്റ് നീണ്ട പോരാട്ടത്തിനൊടുവില് കീഴടക്കിയാണ് ആറാം സീഡ് ജര്മനിയുടെ അലക്സാണ്ടര് സ്വരേവ് സെമിയിലേക്ക് മുന്നേറിയത്. മൂന്ന് മണിക്കൂറിലേറെ നീണ്ട പോരാട്ടത്തിനൊടുവില് 6-1, 6-3, 6-7 (2-7), 6-4 എന്ന സ്കോറിനായിരുന്നു ജര്മന് താരത്തിന്റെ വിജയം. കരിയറില് രണ്ടാം തവണയാണ് സ്വരേവ് സെമിയില് പ്രവേശിക്കുന്നത്. കഴിഞ്ഞ വര്ഷം രണ്ടാം റൗണ്ടില് പുറത്തായിരുന്നു. സെമിയില് മെദ്വദേവും സ്വരേവും ഏറ്റുമുട്ടും.
വനിതാ വിഭാഗത്തില് വമ്പന് അട്ടിമറികളുമായി കുതിക്കുന്ന ഉക്രെയ്ന് താരം ഡയാനാ യാസ്ട്രെംസ്കയും 12-ാം സീഡ് ചൈനയുടെ ഷെങ് ക്വിന്വെനും സെമിയിലെത്തി. യോഗ്യതാ റൗണ്ട് കടന്നെത്തിയ ഡയാന ചെക്ക് റിപ്പബ്ലിക്കിന്റെ ലിന്ഡ നൊസ്കോവയെ 6-3, 6-4 എന്ന നേരിട്ടുള്ള സെറ്റുകള്ക്ക് പരാജയപ്പെടുത്തി. 12-ാം സീഡ് ചൈനീസ് താരം ഷെങ് റഷ്യന് താരം അന്ന കലിന്സ്കയയെ മൂന്ന് സെറ്റ് നീണ്ട വാശിയേറിയ പോരാട്ടത്തിനൊടുവില് കീഴടക്കിയാണ് സെമിയിലേക്ക് മുന്നേറിയത്. സ്കോര്: 6-7 (4-7), 6-3, 6-1
