പൂച്ചാക്കല്‍: തൈക്കാട്ടുശ്ശേരി പഞ്ചായത്തിലും സിപിഎമ്മില്‍ പൊട്ടിത്തെറി. അഴിമതിയിലും സ്വജനപക്ഷപാതപരമായ നിലപാടിലും പ്രതിഷേധിച്ച് നൂറോളം ഡിവൈഎഫ്‌ഐക്കാര്‍ രാജിവെച്ചു. കഴിഞ്ഞ ദിവസമാണ് സിപിഎം അരൂക്കുറ്റി ലോക്കല്‍ കമ്മറ്റി രണ്ടായി വിഭജിച്ചതിനെ തുടര്‍ന്ന് വ്യാപകമായ രാജി ഭീഷണിയും മറ്റ് പ്രതിഷേധങ്ങളും ഉണ്ടായത്. ചേര്‍ത്തല ഏരിയ കമ്മറ്റി സെക്രട്ടറിയായി ബി.വിനോദ് വന്നതോടെ വ്യാപകമായ പ്രതിഷേധമാണ് പാര്‍ട്ടിക്കുള്ളില്‍ ഉണ്ടായിരിക്കുന്നത്.
ഇതിനിടെ പുതിയതായി നിലവില്‍ വന്ന വടുതല ലോക്കല്‍ കമ്മറ്റി പരിധിയിലെ ഡിവൈഎഫ്‌ഐ യൂണിറ്റ് സെക്രട്ടറിയായി നിയമിതനായത് പോക്‌സോ കേസില്‍ ശിക്ഷക്കപ്പെട്ട ക്രിമിനല്‍ സ്വഭാവമുള്ള ആളാണെന്ന് ആരോപിച്ച് ഒരു വിഭാഗം സംസ്ഥാന കമ്മറ്റിക്ക് പരാതി നല്‍കി. അരൂക്കുറ്റി ലോക്കല്‍ കമ്മറ്റി വിഭജിച്ചതിനെ തുടര്‍ന്നുള്ള പ്രതിഷേധങ്ങളും കൂട്ടരാജി ഭീഷണിയും സംസ്ഥാന നേതൃത്വം ഇടപെട്ട് തല്‍ക്കാലം നിര്‍ത്തിവെച്ചിരിക്കുകയാണ്. എന്നാല്‍ സിപിഎമ്മിലേക്ക് തിരിച്ചു വരാന്‍ ശ്രമിക്കുന്ന പഴയ പ്രവര്‍ത്തകരെ സ്വീകരിക്കാന്‍ സംസ്ഥാന, ജില്ല നേതൃത്വങ്ങള്‍ തയ്യാറായപ്പോള്‍ നിഷേധാത്മക നിലപാടാണ് ചേര്‍ത്തല ഏരിയ കമ്മറ്റി സ്വീകരിക്കുന്നതെന്ന ആരോപണമുണ്ട്.
