മാവേലിക്കര: സിപിഎം ലോക്കല് കമ്മിറ്റി സെക്രട്ടറിയുടെ നേതൃത്വത്തില് മുന് പാര്ട്ടി അംഗത്തിനെ മര്ദ്ദിച്ചു. സംഭവത്തില് കേസെടുക്കാതെ മാവേലിക്കര പോലീസ്. ളാഹ ജങ്ഷനു സമീപം തടിമില് നടത്തുന്ന നടയ്ക്കാവ് സ്വദേശി ബിജുവിനാണ് മര്ദനമേറ്റത്.
സിപിഎം ചെട്ടികുളങ്ങര കിഴക്ക് ലോക്കല് കമ്മിറ്റി സെക്രട്ടറി അജിത്തിന്റെ നേതൃത്വത്തിലാണ് ബിജുവിനെ മര്ദ്ദിച്ചത്. കഴിഞ്ഞ ദിവസം രാത്രി എട്ടു മണിയോടെ പുന്നമൂട്ടിലെ മെഡിക്കല് സ്റ്റോറിനു സമീപമായിരുന്നുസംഭവം. മെഡിക്കല് സ്റ്റോറില് മരുന്ന് വാങ്ങാനെത്തിയതായിരുന്നു ബിജു. ഈ സമയംഅവിടെ എത്തിയ അജിത്തും ബിജുവും തമ്മില് തര്ക്കമുണ്ടായി. തര്ക്കത്തിനു ശേഷം ബിജു മടങ്ങിപ്പോകാന് തയാറെടുക്കുമ്പോള് അജിത്ത് വിളിച്ചു വരുത്തിയ 15ഓളം വരുന്ന സിപിഎം പ്രവര്ത്തകര് ബിജുവിനെ ആക്രമിക്കുകയായിരുന്നു.
ബൈക്കില് നിന്നും ബിജുവിനെ തള്ളിത്താഴെയിട്ടാണ് മര്ദ്ദിച്ചത്. മര്ദ്ദനത്തില് ഗുരുതരമായി പരുക്കേറ്റ ബിജുവിനെ ആലപ്പുഴ മെഡിക്കല് കോളജ് ആശുപത്രിയില് പ്രവേശിപ്പിച്ചു. തുടര്ന്ന് ആയുര്വേദ ചികിത്സയ്ക്കായി മാറ്റി. സിപിഎം ചെട്ടികുളങ്ങര കിഴക്ക് ലോക്കല് കമ്മിറ്റിയിലെ നടയ്ക്കാവ് ബ്രാഞ്ച് അംഗമായിരുന്നു ബിജു. കഴിഞ്ഞ പാര്ട്ടി സ്ക്രൂട്ടിണിക്കു ശേഷം മെമ്പര്ഷിപ്പ് പുതുക്കിയിരുന്നില്ല. പൂര്ണമായും ജോലിയുമായി ബന്ധപ്പെട്ട് നില്ക്കുമ്പോഴും പാര്ട്ടി പരിപാടികളില് സജീവമായിരുന്നു.
ആദ്യകാല സിപിഎം കുടുംങ്ങളില് ഒന്നാണ് ബിജുവിന്റേത്. സംഭവത്തില് പരാതി നല്കിയിട്ടും മാവേലിക്കര പോലീസ് അന്വേഷണത്തിന് തയാറായിട്ടില്ലെന്ന് ബിജു പറഞ്ഞു. പോലീസിനുമേല് കടുത്ത സമ്മര്ദ്ദമുള്ളതായാണ് സൂചന.
ഇതിനിടെ കേസ് ഒത്തുതീര്പ്പാക്കാനും ശ്രമങ്ങള് നടക്കുന്നുണ്ട്. പോലീസ് കേസ് അന്വേഷിക്കാന് തയാറാകാത്ത സാഹചര്യത്തില് ഉന്നത തലത്തില് പരാതിനല്കാനാണ് ബിജുവിന്റെ തീരുമാനം.
