മലപ്പുറം : പന്തല്ലൂരില് യുവതിയെ ഭര്തൃഗൃഹത്തില് തൂങ്ങി മരിച്ച നിലയില് കണ്ടെത്തി. മങ്കട വെള്ളില സ്വദേശിനി പന്തല്ലൂര് കിഴക്കുപറമ്പ് മദാരികുപ്പേങ്ങല് നിസാറിന്റെ ഭാര്യ തഹ്ദിലയാണ്(ചിഞ്ചു25) ആത്മഹത്യ ചെയ്തത്. സംഭവത്തില് തഹ്ദിലയുടെ ഭര്തൃപിതാവ് മദാരി അബൂബക്കറെ പോലീസ് അറസ്റ്റ് ചെയ്തു.
അബുബക്കര് തഹ്ദിലയെ ഉപദ്രവിച്ചിരുന്നതായി ബന്ധുക്കള് പോലീസില് മൊഴി നല്കിയിരുന്നു. ആത്മഹത്യാ പ്രേരണാക്കുറ്റം ചുമത്തിയാണ് പോലീസ് അറസ്്റ്റ് ചെയ്തിരിക്കുന്നത്. അസ്വഭാവിക മരണത്തിനാണ് പോലീസ് കേസെടുത്തിരിക്കുന്നത്.
കഴിഞ്ഞ വ്യാഴം രാത്രി ഒമ്പതരയോടെയാണ് തഹ്ദിലയെ മരിച്ച നിലയില് കണ്ടെത്തിയത്. ഉടന് തഹ്ദിലയുടെ ബന്ധുക്കളെ വിളിച്ച് വിവരം അറിയിക്കുകയായിരുന്നു. തഹ്ദിലയെ പെട്ടന്ന് തന്നെ ആശുപത്രിയില് എത്തിക്കാന് ആവശ്യപ്പെട്ടെങ്കിലും ഭര്തൃവീട്ടുകാര് തയാറായില്ലെന്ന് തഹ്ദിലയുടെ ബന്ധുക്കള് ആരോപിച്ചു. ഗാര്ഹിക പീഡനം മൂലമാണ് മരിച്ചതെന്ന് ആരോപിച്ച് ഭര്തൃപിതാവിനും മാതാവിനുമെതിരെ തഹ്ദിലയുടെ ബന്ധുക്കള് പോലീസില് പരാതി നല്കിയിരുന്നു.
വിദേശത്തുള്ള ഭര്ത്താവ് നിസാര് ഇന്നലെ വൈകിട്ടോടെയാണ് നാട്ടിലെത്തിയത്. മൃതദേഹം പോസ്റ്റ്മോര്ട്ടത്തിനു ശേഷം കബറടക്കി. മക്കള്: അസ്മല്, അന്ഫാല്, എസിന് ഫാറൂഖ്, ഫെല്ല മെഹ്റിന്.
