കൊച്ചി: എറണാകുളം മഹാരാജാസ് കോളേജില്‍ എസ്എഫ്ഐ യൂണിറ്റ് സെക്രട്ടറിക്ക് കുത്തേറ്റു. എസ്എഫ്ഐ നേതാവ് നാസര്‍ അബ്ദുള്‍ റഹ്മാനാണ് കുത്തേറ്റത്. വ്യാഴാഴ്ച പുലര്‍ച്ചെയാണ് സംഭവം. കാലിനും വയറിന്റെ ഭാഗത്തും കൈയ്‌ക്കുമാണ് പരിക്കുള്ളത്. വെൽഫെയർ പാർട്ടിയുടെ വിദ്യാർഥി യുവജന വിഭാഗമാണ് ഫ്രറ്റേണിറ്റി മൂവ്‌മെന്റ്.
സാരമായി പരിക്കേറ്റ വിദ്യാര്‍ത്ഥിയെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ആക്രമണത്തിന് പിന്നില്‍ ഫ്രറ്റേണിറ്റി പ്രവര്‍ത്തകരാണെന്ന് എസ്എഫ്ഐ ആരോപിക്കുന്നു. കോളേജില്‍ കഴിഞ്ഞ കുറച്ച് ദിവസങ്ങളായി സംഘര്‍ഷം നിലനിന്നിരുന്നു. ആക്രമണം അതിന്റെ തുടര്‍ച്ചയാണെന്നാണ് പ്രാഥമിക നിഗമനം.
കോളേജിലെ നാടക പരിശീലനവുമായി ബന്ധപ്പെട്ട് സംസാരിക്കുന്നതിനിടെ ഇരുപതോളം പേര്‍ അടങ്ങുന്ന സംഘം മാരകായുധങ്ങളുമായി എത്തി ആക്രമിച്ചതാണെന്നാണ് എസ്എഫ്ഐ ആരോപിക്കുന്നത്. പോലീസ് അന്വേഷണം ആരംഭിച്ചിട്ടുണ്ട്. സംഭവത്തില്‍ രണ്ട് പേരെ കസ്റ്റിഡിയില്‍ എടുത്തതായാണ് സൂചന.
