തിരുവനന്തപുരം : തിരക്കിലായതിനാല്‍ ഇക്കുറിയും ഇഡിക്ക് മുന്‍പില്‍ ഹാജരാകില്ലെന്ന് തോമസ് ഐസക്ക്. ജനവരി 21 വരെ മൈഗ്രേഷന്‍ കോണ്‍ക്ലേവ് കാരണം തിരക്കിലാണെന്നാണ് തോമസ് ഐസക്കിന്റെ വാദം.
കിഫ്ബി മസാല ബോണ്ട് കേസില്‍ ചോദ്യം ചെയ്യലിന് ജനവരി 12ന് ഹാജരാകാനാണ് ഇഡി ആവശ്യപ്പെട്ട്. കൊച്ചിയിലെ എന്‍ഫോഴ്‌സ്‌മെന്റ് ഓഫീസില്‍ ഹാജരാകണമെന്ന് ആവശ്യപ്പെട്ടാണ് നോട്ടീസ് ഇഡി നല്കിയത്.
ഇഡിയുടെ നടപടിക്കെതിരെ തോമസ് ഐസക് കോടതിയെ സമീപിച്ചെങ്കിലും കേന്ദ്ര ഏജന്‍സിക്ക് തുടര്‍ അന്വേഷണവുമായി മുന്നോട്ട് പോകാമെന്ന ഹൈക്കോടതിയുടെ അറിയിപ്പിനെ തുടര്‍ന്നാണ് ഇഡി വീണ്ടും നോട്ടീസ് നല്കിയത്. .
തോമസ് ഐസക്കിന് നോട്ടീസ് അയക്കുന്നതില്‍ നിന്നും നേരത്തെ ഇഡിയെ ഹൈക്കോടതി വിലക്കിയിരുന്നു. . വ്യക്തിഗത വിവരങ്ങള്‍ ചോദിച്ചെന്നെ തോമസ് ഐസക്കിന്റെ ഹര്‍ജിയിലായിരുന്നു ഹൈക്കോടതി ഇങ്ങിനെ വിധിച്ചത്. .
ഇഡി തനിക്കെതിരെ തുടര്‍ച്ചയായി സമന്‍സുകള്‍ അയയ്‌ക്കുകയാണെന്നും അനാവശ്യ രേഖകള്‍ ഹാജരാക്കണമെന്ന് ആവശ്യപ്പെടുന്നുവെന്നും കേസിന്റെ പിന്നില്‍ രാഷ്‌ട്രീയ താത്പര്യങ്ങളുമാണെന്നുമായിരുന്നു തോമസ് ഐസക്കിന്റെ വാദം. ബന്ധുക്കളുടെ അടക്കം 10 വര്‍ഷത്തെ മുഴുവന്‍ സാമ്പത്തിക ഇടപാടിന്റെ രേഖകള്‍ ഹാജരാക്കണമെന്നും സമന്‍സില്‍ അവശ്യപ്പെട്ടുവെന്നും പറഞ്ഞാണ് തോമസ് ഐസക്ക് ഹൈക്കോടതിയെ സമീപിച്ചത്. തുടര്‍ന്ന് തോമസ് ഐസക്കിന് സമന്‍സ് അയക്കുന്നത് നിര്‍ത്തിവെക്കണം എന്ന് കോടതി വിധിച്ചിരുന്നു. അതേ സമയം കേസില്‍ അന്വഷണവുമായി ഇഡിക്ക് മുന്നോട്ട് പോകാമെന്നും കോടതി അറിയിച്ചിരുന്നു. ഇതേ തുടര്‍ന്നാണ് തോമസ് ഐസക്കിനെ വീണ്ടും വിളിപ്പിച്ചിരിക്കുന്നത്.വ്യക്തിഗത വിവരങ്ങള്‍ ചോദിക്കില്ലെന്ന് വ്യക്തമാക്കിയാണ് ഇക്കുറി ഇഡിയുടെ സമന്‍സ്.
