പത്തനംതിട്ട: മൈലപ്രയിലെ വയോധികനായ വ്യാപാരിയുടെ മരണത്തിൽ ദുരൂഹതകളേറെ. കൊലപാതകത്തിൽ പ്രത്യേക അന്വേഷണ സംഘത്തെ രൂപീകരിച്ചു. പത്തനംതിട്ട എസ്പി വി അജിത്തിനാണ് അന്വേഷണത്തിന്റെ മേൽനോട്ടം. രണ്ട് ഡിവൈഎസ്പിമാർക്കാണ് അന്വേഷണ ചുമതല നൽകിയിരിക്കുന്നത്. കൊലപാതകത്തിന് പിന്നിൽ വൻ ആസൂത്രണം നടന്നിരിക്കുന്നതായി പ്രാഥമിക അന്വേഷണത്തിൽ തെളിഞ്ഞിരുന്നു. മോഷണശ്രമത്തിനിടെ ഉണ്ടായ കൊലപാതകമെന്നാണ് പ്രാഥമിക നിഗമനം.
കൈകാലുകൾ കെട്ടി, വായിൽ തുണി തിരുകിയ നിലയിലായിരുന്നു കടയ്ക്കുള്ളിൽ നിന്നും ജോർജ് ഉണ്ണുണ്ണിയുടെ മൃതദേഹം കണ്ടെത്തിയത്. കടയിൽ നിന്നും പണവും ഇദ്ദേഹത്തിന്റെ കഴുത്തിൽ നിന്നും മാലയും നഷ്ടപ്പെട്ടതായി പ്രാഥമിക അന്വേഷണത്തിൽ കണ്ടെത്തി. സംഭവത്തിന് പിന്നാലെ കട പോലീസ് സീൽ ചെയ്തു.
സ്ഥാപനത്തിലെ സിസിടിവി ഹാർഡ് ഡിസ്ക് നഷ്ടമായിട്ടുണ്ട്. മൈലപ്ര ബാങ്കിന്റെ സെക്രട്ടറിയുടെ പിതാവാണ് ജോർജ്. എല്ലാ ദിവസവും ആറ് മണിക്ക് ജോർജ് കടയടച്ചുപോകാറാണ് പതിവ്. കൊച്ചുമകനാണ് ആദ്യം മൃതദേഹം കണ്ടത്. വീട്ടിലേക്ക് വിളിച്ചുകൊണ്ടുപോകാൻ എത്തിയപ്പോഴാണ് മരിച്ച നിലയിൽ കണ്ടെത്തിയത്. മൃതദേഹം ഇന്ന് കോട്ടയം മെഡിക്കൽ കോളജിൽ പോസ്റ്റ് മോർട്ടം നടത്തും.
