കാലിഫോര്ണിയ: ശ്രീ സ്വാമിനാരായണ ക്ഷേത്ര മതില് വികൃതമാക്കിയതിനെ അപലപിച്ച് യുഎസ് സ്റ്റേറ്റ് ഡിപ്പാര്ട്ട്മെന്റ്.കുറ്റവാളികളെ നിയമത്തിന് മുന്നില് കൊണ്ടുവരാനുളള നെവാര്ക്ക് പൊലീസ് നീക്കത്തെ സ്വാഗതം ചെയ്യുന്നതായും അധികൃതര് പറഞ്ഞു.
കാലിഫോര്ണിയയിലെ ശ്രീ സ്വാമിനാരായണ ഹിന്ദു ക്ഷേത്രം തകര്ത്തതിനെ ഞങ്ങള് അപലപിക്കുന്നു.ഉത്തരവാദികളെ നിയമത്തിന് മുന്നില് കൊണ്ടുവരാനുളള നെവാര്ക്ക് പൊലീസ് നീക്കത്തെ ഞങ്ങള് സ്വാഗതം ചെയ്യുന്നു, -”ബ്യൂറോ ഓഫ് സൗത്ത് ആന്ഡ് സെന്ട്രല് ഏഷ്യന് അഫയേഴ്സിനായുള്ള യുഎസ് സ്റ്റേറ്റ് ഡിപ്പാര്ട്ട്മെന്റിന്റെ ഔദ്യോഗിക എക്സ് ഹാന്ഡിലില് കുറിച്ചു.
കാലിഫോര്ണിയയിലെ നെവാര്ക്കിലുള്ള സ്വാമിനാരായണ ക്ഷേത്രമതില് വികൃതമാക്കിയതിന് പിന്നാലെയാണ് യുഎസ് സ്റ്റേറ്റ് ഡിപ്പാര്ട്ട്മെന്റ് പ്രസ്താവന ഇറക്കിയത്.ക്ഷേത്ര മതിലില് ഇന്ത്യാ വിരുദ്ധ, മോദി വിരുദ്ധ, ഹിന്ദു വിരുദ്ധ ചുവരെഴുത്തുകളാണ് പ്രത്യക്ഷപ്പെട്ടത്.
സംഭവത്തില് വിദേശകാര്യ മന്ത്രി എസ് ജയശങ്കര് ആശങ്ക പ്രകടിപ്പിച്ചിരുന്നു.ഞങ്ങളുടെ കോണ്സുലേറ്റ് യുഎസ് സര്ക്കാരിനും അവിടെയുള്ള പൊലീസിനും പരാതി നല്കിയിട്ടുണ്ട്. വിഷയം അന്വേഷിക്കുകയാണെന്ന് വിശ്വസിക്കുന്നുവെന്നും അദ്ദേഹം പ്രതികരിച്ചു.
ക്ഷേത്ര മതില് വികൃതമാക്കിയതിന് പിന്നില് ഖാലിസ്ഥാന് തീവ്രവാദികളാണെന്നാണ് റിപ്പോര്ട്ട്.
