മുംബൈ: ബിജെപി മഹാരാഷ്‌ട്ര കേരള സെല്ലിന്റെ സഹകരണത്തോടു കൂടി വസായ് സനാതന ധര്‍മ്മസഭ ജനുവരി 6, 7, 8 തീയതികളില്‍ വസായ് ശബരിഗിരി ശ്രീഅയ്യപ്പ ക്ഷേത്രത്തില്‍ സംഘടിപ്പിക്കുന്ന ഹിന്ദു മഹാസമ്മേളനം വിശ്വഹിന്ദു പരിഷത്ത് കേരള സംസ്ഥാന അധ്യക്ഷന്‍ വിജി തമ്പി ഉദ്ഘാടനം ചെയ്യും.
ആറിന് മള്ളിയൂര്‍ പരമേശ്വരന്‍ നമ്പൂതിരിയുടെ മുഖ്യകാര്‍മ്മികത്വത്തില്‍ നൂറ്റിയെട്ട് നാളികേരത്തിന്റെ അഷ്ടദ്രവ്യ മഹാഗണപതി ഹോമത്തോടെ സമ്മേളനം ആരംഭിക്കും. എട്ടിന് ഉദ്ഘാടന സമ്മേളനം. 11 മണിക്ക് വനിതാ സമ്മേളനവും വൈകിട്ട് മൂന്നിന് ആധ്യാത്മിക പ്രഭാഷണം. ഏഴിന് യതി പൂജയും സംന്യാസി സമ്മേളനവും. ധര്‍മ്മരക്ഷാ പുരസ്‌കാരങ്ങള്‍ ചടങ്ങില്‍ വിതരണം ചെയ്യും.
ഏഴിന് രാവിലെ 9ന് യുവജന സമ്മേളനത്തില്‍ എംപി സാധ്വി പ്രജ്ഞാ സിങ് ഠാക്കൂര്‍ പങ്കെടുക്കും. എട്ടിന് രാവിലെ ഏഴിന് കൊല്ലൂര്‍ മൂകാംബിക ക്ഷേത്രം തന്ത്രി ഡോ. രാമചന്ദ്ര അഡിഗയുടെ മുഖ്യകാര്‍മ്മികത്വത്തില്‍ നവചണ്ഡിക ഹോമം.
കൊളത്തൂര്‍ അദൈ്വതാശമ മഠാധിപതി സ്വാമി ചിദാനന്ദപുരി, മുതിര്‍ന്ന ബിജെപി നേതാവ് കെ.രാമന്‍ പിള്ള, മുംബൈ ശ്രീരാമദാസ ആശ്രമ മഠാധിപതി സ്വാമി കൃഷ്ണാനന്ദ സരസ്വതി, ശിവഗിരി മഠത്തിലെ സ്വാമി ബ്രഹ്മസ്വരൂപാനന്ദ, അയിരൂര്‍ ചെറുകോല്‍പുഴ ജ്ഞാനാനന്ദാശ്രമം മഠാധിപതി സ്വാമിനി ദേവി സംഗമേശാനന്ദ സരസ്വതി തുടങ്ങി നിരവധി പ്രമുഖര്‍ പങ്കെടുക്കുമെന്ന് കണ്‍വീനര്‍ കെ.ബി. ഉത്തംകുമാര്‍ അറിയിച്ചു.
