കന്നഡ നടി ഹേമ ചൗധരിയെ ആശുപത്രിയിൽ പ്രവേശിപ്പിച്ചു, നില ഗുരുതരമെന്ന് റിപ്പോർട്ട്

അടുത്തിടെ ലീലാവതി പുണ്യ തിഥിയിൽ പങ്കെടുത്ത ഹേമ ആശുപത്രിയിലാണെന്നാണ് റിപ്പോർട്ട്. രണ്ട് ദിവസം മുമ്പ് മസ്തിഷ്ക രക്തസ്രാവം ഉണ്ടായതിനെ തുടർന്ന് അവരുടെ നില അതീവഗുരുതരമാണെന്ന് റിപ്പോർട്ടുകൾ പറയുന്നു

ബാംഗ്ലൂരിലെ സ്വകാര്യ ആശുപത്രിയിൽ പ്രവേശിപ്പിച്ച ഹേമക്ക്  ഏതാനും ദിവസങ്ങൾക്ക് മുമ്പ് മസ്തിഷ്ക രക്തസ്രാവം ഉണ്ടായതിനെ തുടർന്ന് അതീവ ഗുരുതരാവസ്ഥയിലായിരുന്നുവെന്ന് മാധ്യമങ്ങൾ റിപ്പോർട്ട് ചെയ്യുന്നു.

ബംഗളൂരു ബാപ്റ്റിസ്റ്റ് ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലാണ് ഇവർ. വിദേശത്ത് കഴിയുന്ന മകനുവേണ്ടി അവർ കാത്തിരിക്കുകയാണെന്നാണ് റിപ്പോർട്ട്. ആശുപത്രിയുടെ ഔദ്യോഗിക സ്ഥിരീകരണവും ആരോഗ്യ ബുള്ളറ്റിനും ഇനിയും പുറത്തുവന്നില്ല.

180-ലധികം സിനിമകളിൽ അഭിനയിച്ചിട്ടുള്ള പ്രശസ്ത കന്നഡ നടിയാണ് ഹേമ ചൗധരി. അഭിനയത്തിനുപുറമെ, അവർ ഒരു മികച്ച കുച്ചിപ്പുടി നർത്തകി കൂടിയാണ്, തന്റെ ഗുരുവായ വെമ്പട്ടി ചിന്ന സത്യത്തിനൊപ്പം 700-ലധികം പ്രകടനങ്ങൾ നടത്തി ലോകമെമ്പാടുമുള്ള പ്രേക്ഷകരെ വിസ്മയിപ്പിച്ചിട്ടുണ്ട്. കന്നഡ, തെലുങ്ക്, മലയാളം, തമിഴ് ഭാഷകളിലായി വിവിധ ചിത്രങ്ങളിൽ ഇവർ പ്രത്യക്ഷപ്പെട്ടിട്ടുണ്ട്.

ചെന്നൈയിലെ ഒരു ആക്ടിംഗ് സ്‌കൂളിൽ സൂപ്പർസ്റ്റാർ രജനികാന്തിന്റെ സഹപാഠി കൂടിയായ അവർ പിന്നീട് ദേശീയ ചലച്ചിത്ര അവാർഡ് കമ്മിറ്റിയിൽ മൂന്ന് വർഷം ജഡ്ജിയായും സേവനമനുഷ്ഠിച്ചു.