കൊച്ചി: കാഴ്ച്ചപരിമിതരുടെ അന്തര്‍ സംസ്ഥാന ക്രിക്കറ്റ് ടൂര്‍ണ്ണമെന്റായ നാഗേഷ് ട്രോഫിയുടെ കേരളം ഉള്‍പ്പെടുന്ന ഗ്രൂപ്പ് സി മത്സരങ്ങള്‍ തിങ്കളാഴ്‌ച്ച കൊച്ചിയില്‍ ആരംഭിക്കും. ടൂര്‍ണമെന്റിന്റെ ഔപചാരിക ഉദ്ഘാടനം ഇന്ന് വൈകിട്ട് അഞ്ചിന് തൃപ്പൂണിത്തുറ പാലസ് ഓവല്‍ ഗ്രൗണ്ടില്‍ നടക്കും.
ഇന്ത്യന്‍ വനിതാ ടീമംഗമായ മിന്നുമണി ടൂര്‍ണ്ണമെന്റ് ഉദ്ഘാടനം ചെയ്യും. ഈ മാസം 22 വരെയാണ് മത്സരങ്ങള്‍. ടൂര്‍ണമെന്റിന്റെ ആറാം പതിപ്പാണിത്. ഇത്തവണ കേരളത്തിനു പുറമെ ബിഹാര്‍, ജാര്‍ഖണ്ഡ്, ഒഡിഷ, ഉത്തര്‍പ്രദേശ് ടീമുകളാണ് ഗ്രൂപ്പ് സിയിലുള്ളത്. നാഗേഷ് ട്രോഫിയുടെ ചരിത്രത്തില്‍ ആദ്യമായാണ് പ്രാഥമിക റൗണ്ടിലെ ഒരു ഗ്രൂപ്പിലെ എല്ലാ മത്സരങ്ങളും കേരളത്തില്‍ നടക്കുന്നത്.
സംസ്ഥാനത്ത് നടക്കുന്ന ദേശീയ ടൂര്‍ണ്ണമെന്റില്‍ മികച്ച പ്രകടനം കാഴ്‌ച്ചവെക്കാന്‍ കേരള ടീം ഒരുങ്ങിയതായി കേരള ബ്ലൈന്‍ഡ് ക്രിക്കറ്റ് അസോസിയേഷന്‍(സിഎബികെ) അധ്യക്ഷന്‍ രജനീഷ് ഹെന്റി വാര്‍ത്താസമ്മേളനത്തില്‍ പറഞ്ഞു. നാവിയോ ഷിപ്പിങ് പ്രൈവറ്റ് ലിമിറ്റഡ് ആണ് ടൂര്‍ണമെന്റിന്റെ പ്രധാന സ്‌പോണ്‍സര്‍മാര്‍.
കേരളം നാളെ ആദ്യ മത്സരത്തില്‍ ബിഹാറിനെ നേരിടും. തുടര്‍ന്നുള്ള ഓരോ ദിവസങ്ങളിലും യഥാക്രമം ഒഡീഷ, ഉത്തര്‍ പ്രദേശ്, ജാര്‍ഖണ്ഡ് ടീമുകളെ നേരിടും. അനന്തു ശശികുമാര്‍ ക്യാപ്റ്റനും എന്‍ കെ വിഷ്ണു വൈസ് ക്യാപ്റ്റനുമായി 14 അംഗ ടീമാണ് കേരളത്തിന്റേത്. എം. വേണുഗോപാല്‍, എ.വി.ബിനീഷ്, ജിബിന്‍ പ്രകാശ്, കെ.ബി. സായന്ത്, എ. മനീഷ്, സച്ചിന്‍ തുളസീധരന്‍, എസ്. ശൈലാജ്, സി.കെ. സദക്കത്തുല്‍ അന്‍വര്‍, എ. മുഹമ്മദ് ഫര്‍ഹാന്‍, മുഹമ്മദ് കമാല്‍, കെ.എം. ജിനീഷ് എന്നിവരാണ് ടീമിലെ മറ്റംഗങ്ങള്‍. കെ. ശിവകുമാര്‍, ഇ.ബി. ഇസ്മായില്‍, ഷാഹുല്‍ ഹമീദ്, കെ. അബ്ദുള്‍ മുനാസ്, കെ.പി. അബ്ദുല്‍ റഹ്മാന്‍ എന്നിവര്‍ റിസര്‍വ് താരങ്ങളായി ടീമിലുണ്ട്. പോണ്ടിച്ചേരിയിലും കേരളത്തിലുമായാണ് രണ്ട് മാസത്തെ സെലക്ഷന്‍ ട്രയല്‍സ് നടന്നത്. മൊത്തം 28 ടീമുകള്‍ മത്സരിക്കുന്ന ടൂര്‍ണമെന്റിന്റെ ഗ്രൂപ്പ് മത്സരങ്ങള്‍ ആറു വേദികളിലായാണ് നടക്കുന്നത്.
കൊച്ചിക്കു പുറമെ ജമ്മു, ഡെറാഡൂണ്‍, ഛണ്ഡീഗഢ്, കോട്ട, അഗര്‍ത്തല എന്നിവയാണ് മറ്റു വേദികള്‍. സൂപ്പര്‍ 8 മത്സരങ്ങള്‍ ജനുവരി 29 മുതല്‍ ഫെബ്രുവരി 2 വരെ നാഗ്പൂരില്‍ നടക്കും. വാര്‍ത്താസമ്മേളനത്തില്‍ കേരള ക്യാപ്റ്റന്‍ അനന്തു ശശികുമാറും പങ്കെടുത്തു. കേരള ടീമിനു പ്രചോദനം പകരാന്‍ മ്യൂസിക് ഡയറക്ടറും നടനുമായ മുന്‍ ബ്ലൈന്‍ഡ് ക്രിക്കറ്റ് താരം രാഹുല്‍ രാജ് രചിച്ച് സംഗീതം പകര്‍ന്ന ഗാനം വാര്‍ത്താസമ്മേളനത്തില്‍ പുറത്തിറക്കി.
