തൃശൂർ: നഴ്സിംഗ് പ്രവേശന തട്ടിപ്പുമായി ബന്ധപ്പെട്ട് യുവാവിനെ തട്ടിക്കൊണ്ടുപോയ സംഭവത്തിൽ അഞ്ചംഗ സംഘം അറസ്റ്റിൽ. തൃശൂർ സ്വദേശി ജോഷി മാത്യുവിനെ തട്ടിക്കൊണ്ട് പോയി മർദ്ദിച്ച കേസിലാണ് അഞ്ചംഗ സംഘം അറസ്റ്റിലായത്. നഴ്സിംഗ് പ്രവേശനത്തിന്റെ മറവിൽ ജോഷിയുടെ സുഹൃത്ത് പണം തട്ടിയെടുത്തിരുന്നു. ഇത് തിരികെ ലഭിക്കുന്നതിന് വേണ്ടിയാണ് തട്ടിക്കൊണ്ടുപോയി മർദ്ദിച്ചത്.
ജോഷിയാണ് പണം തട്ടിയെടുത്ത് മുങ്ങിയ അഖിലിനെ സംഘത്തിന് പരിചയപ്പെടുത്തി നൽകിയത്. പിന്നാലെ ഇവർ അഖിലിന്റെ കൈവശം 18 ലക്ഷം രൂപ നൽകി. പണം കൈപ്പറ്റി അഖിൽ നാട് വിട്ടു. തുടർന്ന് നഴ്സിംഗ് പ്രവേശനം ശരിയാക്കി നൽകാത്തതിനാണ് ജോഷിയെ തട്ടിക്കൊണ്ടു പോയത്.
ചൊവ്വാഴ്ച പുലർച്ചയോടെയായിരുന്നു സംഭവം. പാലാരിവട്ടം പാലത്തിന് സമീപത്ത് നിന്നും അഞ്ചംഗ സംഘം യുവാവിനെ ബലപ്രയോഗത്തിലൂടെ കാറിൽ തട്ടക്കൊണ്ട് പോകുകയായിരുന്നു. ആളൊഴിഞ്ഞ കെട്ടിടത്തിലെത്തിച്ച് സംഘം യുവാവിനെ ക്രൂരമായി മർദ്ദിച്ചു. പിന്നാലെ ജോഷിയുടെ അഞ്ച് പവന്റെ സ്വർണാഭരണവും 30,000 രൂപയും തട്ടിയെടുത്ത് സംഘം കടന്നു കളയുകയായിരുന്നു.
