ചെന്നൈ: പാര്ലമെന്റിലും മറ്റും നടക്കുന്ന ചര്ച്ചകളില് തറ നിലവാരത്തില് സംസാരിക്കാന് ഡിഎംകെ നേതാക്കള്ക്ക് മാത്രമേ കഴിയൂ എന്ന് ബിജെപി തമിഴ്നാട് സംസ്ഥാന പ്രസിഡന്റ് കെ. അണ്ണാമലൈ. എംപി സെന്തില് കുമാറിന്റെ പരാമര്ശത്തിന് എക്സില് മറുപടി നല്കുകയായിരുന്നു അദ്ദേഹം.
ഡിഎംകെയുടെ ദുര്ഭരണവും കെടുകാര്യസ്ഥതയും കൊണ്ട് ചെന്നൈ നഗരം മുങ്ങുന്നതിനിടയിലാണ് ഇത്തരം തരംതാണ പ്രസ്താവനകളെന്ന് അണ്ണാമലെ ചൂണ്ടിക്കാട്ടി. ഭാരതത്തിന്റെ വടക്കുഭാഗത്തുള്ള സഹോദരരെ ഇവര് മുമ്പ് വിളിച്ചത് പാനിപ്പൂരി വില്പനക്കാരെന്നും കക്കൂസ് പണിക്കാരെന്നുമാണ്.
ഇപ്പോള് ഗോമൂത്ര സംസ്ഥാനങ്ങളെന്ന് വിളിക്കുന്നു. തെക്കുഭാഗത്ത് ബിജെപി ജയിക്കില്ലെന്നാണ് അവര് പറയുന്നത്. പുതുച്ചേരി ഇപ്പോള് ഭരിക്കുന്നതും കര്ണാടകയില് കഴിഞ്ഞ വര്ഷം വരെ ഭരിച്ചതും ബിജെപിയാണെന്ന് അവര് മറന്നുപോയി. ഇന്ഡി മുന്നണിയുടെ വലിയ തകര്ച്ചയ്ക്ക് പ്രധാനകാരണങ്ങളിലൊന്ന് ഡിഎംകെയുടെ ഇത്തരം പരാമര്ശങ്ങളാണ്, അണ്ണാമലൈ പറഞ്ഞു.
