ശബരിമല: തുടര്ച്ചയായി കാനന വാസനെ പതിനെട്ട് തവണ ദര്ശനം നടത്തിയ പുണ്യവുമായി തീര്ത്ഥ എസ്.നായര്. ആലപ്പുഴ കുട്ടനാട് വേഴപ്ര സ്വദേശി സന്തോഷിന്റെയും സ്മിതയുടെയും ഏക മകളാണ് തീര്ത്ഥ. കൊവിഡിന് ശേഷമാണ് തുടര്ച്ചയായി അച്ഛന് സന്തോഷിനും മുത്തച്ഛന് വിശ്വനാഥ കൈമളിനുമൊപ്പം ശബരിമലയിലേക്ക് ദര്ശനത്തിന് എത്തിതുടങ്ങിയത്.
ഇതിനിടെ ചില മാസങ്ങളില് ദര്ശനത്തിന് എത്താന് സാധിക്കാതെ വന്നിട്ടുണ്ട്. അതൊഴിച്ചാല് കഴിയുന്ന എല്ലാ മാസങ്ങളിലും ദര്ശനത്തിന് എത്തിയിട്ടുണ്ടെന്ന് സന്തോഷ് പറഞ്ഞു. എല്ലാ മാസവും വീട്ടില് നിന്ന് കെട്ട് നിറച്ചാണ് തീര്ത്ഥ ശബരീശ സന്നിധിയിലേക്ക് എത്തിയിരുന്നത്.
കഴിഞ്ഞ ദിവസം 18ാംമത് മല ചവിട്ടിയാണ് തീര്ത്ഥ ശബരീശ ദര്ശനം നടത്തിയത്. ആചാരത്തിന്റെ ഭാഗമായി അയ്യപ്പ സന്നിധിയില് തീര്ത്ഥ തെങ്ങ് സമര്പ്പിച്ചു. പത്ത് വയസ് പൂര്ത്തിയായതിനാല് ഇനി 50 വയസിന് ശേഷം ശബരീശനെ കാണാന് വരുമെന്ന വാക്ക് നല്കിയാണ് തീര്ത്ഥ മലയിറങ്ങിയത്.
