കൊല്ലം: സിപിഎം ഏരിയ കമ്മിറ്റി അംഗമായ കോര്പറേഷന് കൗണ്സിലര് ലൈംഗികച്ചുവയോടെ സംസാരിച്ചെന്നും കടന്നു പിടിച്ചതായും അപവാദങ്ങള് പ്രചരിപ്പിക്കുന്നെന്നും മേയര്ക്ക് വനിതാ കൗണ്സിലറുടെ പരാതി.
കൊല്ലം ഈസ്റ്റ് ഏരിയകമ്മിറ്റിയംഗവും പള്ളിമുക്ക് ഡിവിഷന് കൗണ്സിലറുമായ സജീവന് എതിരെയാണ് പരാതി. സിപിഎം ലോക്കല് കമ്മിറ്റിയംഗം കൂടിയായ വനിതാ കൗണ്സിലര് ലെറ്റര് പാഡില് അഞ്ച് പേജുള്ള പരാതിയാണ് നല്കിയത്. ജോലി ചെയ്യുന്ന സ്ഥാപനത്തില് അതിക്രമിച്ചു കയറി കടന്നുപിടിച്ച് മൊബൈല് ഫോണും വാഹനത്തിന്റെ താക്കോലും കൈക്കലാക്കാന് ശ്രമിച്ചെന്നും മേയര്ക്ക് നല്കിയ പരാതിയില് പറയുന്നു. ഇതിനെതിരെ പരാതി നല്കാന് ഒരുങ്ങിയപ്പോള് പാര്ട്ടിക്ക് ബുദ്ധിമുട്ട് ഉണ്ടാകുമെന്ന് പറഞ്ഞ് ലോക്കല് കമ്മിറ്റി തടഞ്ഞു. ലോക്കല് കമ്മിറ്റി ഇടപെട്ടതിന്റെ ഭാഗമായി കുറച്ചു കാലം പ്രശ്നങ്ങള് ഉണ്ടായിരുന്നില്ല.
പലതവണ ലൈംഗികച്ചുവയോടെ സംസാരിച്ചു. താന് താക്കീത് ചെയ്യുകയും അകല്ച്ച പാലിക്കുകയും ചെയ്തപ്പോഴാണ് സ്ഥാപനത്തില് അതിക്രമിച്ചു കയറിയത്. ഇപ്പോള് പകപോക്കല് എന്ന നിലയില് നിരന്തരം അപവാദം പ്രചരിപ്പിക്കുകയാണ്. രോഗിയായ ഭര്ത്താവിനും മക്കള്ക്കും ഇതുകാരണം മാനസിക ബുദ്ധിമുട്ടുകള് ഉണ്ടാക്കുന്നു. നാട്ടുകാരുടെയും ഏരിയ കമ്മിറ്റി അംഗമായ സ്ഥിരംസമിതി അധ്യക്ഷന് ഉദയകുമാറിന്റെ മുന്നില് വച്ചും അസഭ്യം വിളിച്ചു. ലോക്കല് കമ്മിറ്റിക്കു കീഴിലുള്ള മറ്റു ചിലര്ക്ക് എതിരെയും സജീവ് നിരന്തരം ഇത്തരം പ്രവൃത്തി നടത്തുന്നു.
സ്ത്രീത്വത്തെ അപമാനിക്കുകയും അക്രമങ്ങള് കാണിക്കുകയും ചെയ്യുന്ന കൗണ്സിലര്ക്കെതിരെ പാര്ട്ടി അന്വേഷണം നടത്തി നീതി ഉറപ്പാക്കണം എന്നാണ് പരാതിയില് പറയുന്നത്.
