ബെംഗളൂരു : ഉച്ചഭക്ഷണത്തിനായി സ്കൂളില് തയ്യാറാക്കിയ സാമ്പാര് ചെമ്പിലേക്ക് വീണ്ട് ഗുരുതരമായി പൊള്ളലേറ്റ വിദ്യാര്ത്ഥിനി മരിച്ചു. കല്ബുറഗി ജില്ലയിലെ അഫ്സല്പൂര് താലൂക്കിലെ ചിന്ംഗേര സര്ക്കാര് പ്രൈമറി സ്കൂളിലെ രണ്ടാം ക്ലാസ് വിദ്യാര്ത്ഥിനിയായ മഹന്തമ്മ ശിവപ്പയാണ്(7) മരിച്ചത്. കഴിഞ്ഞ വ്യാഴാഴ്ചയാണ് സംഭവം.
സ്കൂളിലെ അടുക്കളയില് ഉച്ച ഭക്ഷണത്തിനായി തയ്യാറാക്കി വെച്ചിരുന്ന സാമ്പറിന്റെ ചെമ്പിലേക്ക് വിദ്യാര്ത്ഥിനി കാലുതെറ്റി വീഴുകയായിരുന്നു. തുടര്ന്ന് ഉടന് തന്നെ ചൗദാപൂരിലെ പ്രാഥമികാരോഗ്യ കേന്ദ്രത്തില് എത്തിച്ച് പ്രാഥമിക ചികിത്സ നല്കിയ ശേഷം തുടര് ചികിത്സയ്ക്കായി കല്ബുറഗിയിലെ ഗുല്ബര്ഗ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സിലേക്ക് മാറ്റി. മഹന്തമ്മയ്ക്ക് അപകടത്തില് 50 ശതമാനത്തോളം പരിക്കേറ്റിരുന്നു.
മകള്ക്ക് വിദഗ്ദ ചികിത്സ ലഭ്യമാക്കണമെന്ന മാതാപിതാക്കളുടെ നിര്ബന്ധത്തെ തുടര്ന്ന് വിദ്യാര്ഥിനിയെ വെള്ളിയാഴ്ച കല്ബുറഗിയിലെ ബസവേശ്വര ആശുപത്രിയിലേക്ക് മാറ്റിയെങ്കിലും ഞായറാഴ്ചയോടെ മരിക്കുകയായിരുന്നു.
പെണ്കുട്ടിയുടെ അമ്മ സംഗീത ശിവപ്പ നല്കിയ പരാതിയുടെ അടിസ്ഥാനത്തില് ഏഴ് പേര്ക്കെതിരെ പോലീസ് കേസെടുത്തിട്ടുണ്ട്. സ്കൂളിലെ അടുക്കള ജീവനക്കാര്, സ്കൂള് ഹെഡ്മിസ്ട്രസ്, ഉച്ച ഭക്ഷണ പദ്ധതി അസിസ്റ്റന്റ് ഡയറക്ടര്, അഫ്സല്പൂര് ബ്ലോക്ക് വിദ്യാഭ്യാസ ഓഫീസര്, അഫ്സല്പൂര് താലൂക്ക് പഞ്ചായത്ത് ഓഫീസര് എന്നിങ്ങനെ ഉച്ചഭക്ഷണ പദ്ധതിയുമായി ബന്ധപ്പെട്ട മറ്റ് ഉദ്യോഗസ്ഥര്ക്കെതിരെയുമാണ് പോലീസ് കേസെടുത്തത്.
സംഭവത്തില് ഗുരുതര ആരോപണങ്ങളാണ് സ്കൂളിനെതിരെ മരിച്ച വിദ്യാര്ഥിനിയുടെ മാതാവ് സംഗീത ഉന്നയിച്ചത്. ഉച്ച ഭക്ഷണത്തിനായി തടിച്ചുകൂടിയ വിദ്യാര്ത്ഥികളെ നിയന്ത്രിക്കാന് സ്കൂള് ജീവനക്കാര്ക്ക് സാധിച്ചിരുന്നില്ല. വിദ്യാര്ഥികള് കൂട്ടത്തോടെ ഭക്ഷണത്തിനായി തടിച്ചുകൂടുകയും തിക്കിലും തിരക്കിലും പെട്ടാണ് മകള് സാമ്പാര് ചെമ്പിലേക്ക് വീണതെന്ന് സംഗീത ആരോപിച്ചു. അപകടത്തെ ഗൗരവത്തോടെയാണ് കണ്ടത്. സംഭവത്തില് രണ്ട് അധ്യാപകരെ സസ്പെന്ഡ് ചെയ്തിട്ടുണ്ടെന്നും ഒരാളെ പുറത്താക്കിയെന്നും പൊതുവിദ്യാഭ്യാസ ഡെപ്യൂട്ടി ഡയറക്ടര് അറിയിച്ചു.
