അയോധ്യ: ശ്രീരാംലല്ലയുടെ പ്രാണപ്രതിഷ്ഠാ ചടങ്ങുകള്‍ മുന്‍നിര്‍ത്തി അയോധ്യാ നഗരത്തില്‍ ഒരുക്കങ്ങള്‍ സജീവം. രാജ്യത്തുടനീളമുള്ള ഭക്തരെ സ്വീകരിക്കാന്‍ 452 ഹോംസ്റ്റേ സെന്ററുകള്‍ക്ക് അയോധ്യനഗരത്തില്‍ അനുമതി നല്കി. അയോധ്യാവാസികളുടെ തന്നെ അപേക്ഷികളിലാണ് അയോധ്യ വികസന അതോറിറ്റിയുടെ തീരുമാനം.
ജില്ലാ മജിസ്ട്രേറ്റ് നേരിട്ട് സ്ഥലം പരിശോധിച്ചതിനുശേഷമാണ് അതോറിറ്റി അപേക്ഷകള്‍ക്ക് അംഗീകാരം നല്കിയത്. പ്രതിദിനം 1500 മുതല്‍ 2500 രൂപവരെയാണ് ഈ ഹോംസ്റ്റേകള്‍ക്ക് വാടക നിശ്ചയിച്ചിട്ടുള്ളത്. എഡിഎ അംഗീകരിച്ച ഹോംസ്റ്റേ സെന്ററുകളില്‍ അയോധ്യ പോലീസ് പ്രാദേശിക രഹസ്യാന്വേഷണ വിഭാഗം (എല്‍ഐയു) പരിശോധനയും നടത്തിയെന്ന് എഡിഎ വൈസ് ചെയര്‍മാന്‍ വിശാല്‍ സിങ് പറഞ്ഞു. സന്ദര്‍ശകര്‍ക്ക് പ്രാദേശിക വിഭവങ്ങളും അവധ് സംസ്‌കാരത്തിന്റെ സവിശേഷതകളും ആസ്വദിക്കാനുള്ള മികച്ച അവസരമായിരിക്കും ഹോംസ്റ്റേ സൗകര്യമെന്ന് അദ്ദേഹം ചൂണ്ടിക്കാട്ടി.
