തിരുവനന്തപുരം: എലത്തൂര്‍ ട്രെയിന്‍ തീവയ്‌പ്പ് കേസിലെ പ്രതിയുമായുളള പൊലീസിന്റെ യാത്രാവിവരങ്ങള്‍ ചോര്‍ത്തിയെന്നാരോപിച്ച് സസ്‌പെന്‍ഡ് ചെയ്ത ഐ ജി പി വിജയനെ സര്‍വീസിസില്‍ തിരിച്ചെടുത്തു. വിജയന്റെ സസ്‌പെന്‍ഷന്‍ റദ്ദാക്കി മുഖ്യമന്ത്രി പിണറായി വിജയന് ഉത്തരവിറക്കി.എന്നാല്‍ വകുപ്പുതല അന്വേഷണം തുടരും.
ട്രെയിന്‍ തീവയ്‌പ്പ് കേസ് പ്രതിയുടെ അറസ്റ്റിന് പിന്നാലെ കഴിഞ്ഞ ആറുമാസമായി പി വിജയന് സസ്‌പെന്‍ഷനിലായിരുന്നു. വിശദീകരണം തേടാതെയാണ് സസ്‌പെന്‍ഷന്‍.
എന്നാല്‍ തനിക്കെതിരായ ആരോപണങ്ങള്‍ നിഷേധിച്ച് വിജയന് സര്‍ക്കാരിന് വിശദീകരണം നല്‍കിയിരുന്നു.രണ്ട് മാസം കഴിഞ്ഞ് ചീഫ് സെക്രട്ടറി കെ വേണുവിന്റെ അദ്ധ്യക്ഷതയിലുള്ള സമിതി വിഷയം പുനഃപരിശോധിച്ച് സസ്‌പെന്‍ഷന്‍ പിന്‍വലിക്കാന്‍ ആവശ്യപ്പെട്ടെങ്കിലും സര്‍ക്കാര്‍ അനുകൂല നിലപാടെടുത്തില്ല.
പിന്നീട് സെപ്തംബറില്‍ പി വിജയന് അനുകൂലമായി രണ്ടാം തവണയും ചീഫ് സെക്രട്ടറി അദ്ധ്യക്ഷനായ സമിതി റിപ്പോര്‍ട്ട് നല്‍കി. ഇതിന് പിന്നാലെയാണ് ഇപ്പോള്‍ സസ്‌പെന്‍ഷന്‍ പിന്‍വലിച്ചിട്ടുളളത്.
