കൊച്ചി: എറണാകുളം കോലഞ്ചേരിയിൽ വെയർഹൗസ് മാനേജർക്കെതിരെ ജീവനക്കാരുടെ ആക്രമണം. ചെങ്ങന്നൂർ സ്വദേശി സദാശിവനെയാണ് ജീവനക്കാരായ രണ്ട് യുവാക്കൾ മർദ്ദിച്ചത്. മദ്യപിച്ചത് മേലുദ്യോഗസ്ഥരെ അറിയിച്ചതിൽ പ്രകോപിതരായാണ് ആക്രമണം നടത്തിയത്.
വൈപ്പിൻ സ്വദേശിയായ അമലും വാളകം സ്വദേശിയായ വിഷ്ണുവും ചേർന്നാണ് മാനേജർ സദാശിവനെ മർദ്ദിച്ചത്. അമലും വിഷ്ണുവും സ്ഥാപനത്തിൽ വച്ച് മദ്യപിക്കുന്നത് പതിവായിരുന്നു. ഇത് സദാശിവൻ ചോദ്യം ചെയ്തിരുന്നു. ഇരുവരുടെയും സ്വഭാവദൂഷ്യത്തെ കുറിച്ച് സ്ഥാപനത്തിലെ മുതിർന്ന ഉദ്യോഗസ്ഥരെ അറിയിച്ചു. ഇതിൽ പ്രകോപിതരായാണ് യുവാക്കൾ ആക്രമിച്ചത്. പരിക്കേറ്റ സദാശിവൻ ആശുപത്രിയിൽ ചികിത്സ തേടി. പോലീസ് കെസെടുത്ത് അന്വേഷണം ആരംഭിച്ചു. യുവാക്കൾ ഒളിവിലാണ്.
