മലപ്പുറം: കുറ്റിപ്പുറത്ത് സ്വകാര്യബസും ടിപ്പർ ലോറിയും കൂട്ടിയിടിച്ച് അപകടം. അപകടത്തിൽ 20 പേർക്കോളം പരിക്കേറ്റു. രാവിലെ ഏഴ് മണിയോടെയായിരുന്നു അപകടം. കിൻഫ്രയ്ക്ക് സമീപം പള്ളിപ്പടിയിലാണ് അപകടം നടന്നത്. കോഴിക്കോട് നിന്നും തൃശൂർ ഭാഗത്തേക്ക് പോകുകയായിരുന്ന സ്വകാര്യ ബസും എതിർ ദിശയിലെത്തിയ ടിപ്പർ ലോറിയും തമ്മിൽ കൂട്ടിയിടിക്കുകയായിരുന്നു.
അപകടത്തിൽ ടിപ്പർ ലോറി ഡ്രൈവർ ഉൾപ്പെടെ 20 പേർക്ക് പരിക്കേറ്റു. രണ്ട് പേർക്ക് ഗുരുതരമായി പരിക്കേറ്റിട്ടുണ്ട്. ഇവരെ സ്വകാര്യ ആശുപത്രിയിലേക്കും മറ്റുള്ളവരെ കുറ്റിപ്പുറം താലൂക്ക് ആശുപത്രിയിലേക്കും മാറ്റിയതായി പോലീസ് അറിയിച്ചു. സ്വകാര്യ ബസിന്റെ അമിത വേഗതയാണ് അപകടത്തിന് കാരണമായതെന്ന് പ്രദേശവാസികൾ പറയുന്നു.
