നടി ആക്രമിക്കപ്പെട്ട കേസില്‍ വിചാരണക്കോടതിക്കെതിരെ ഉന്നയിച്ച ആരോപണം പിന്‍വലിച്ച് അതിജീവിത. മെമ്മറി കാര്‍ഡ് ചോര്‍ന്നതില്‍ അന്വേഷണം ആവശ്യപ്പെട്ട് ഹൈക്കോടതിയിലിരിക്കുന്ന കേസിന്റെ നടപടികള്‍ക്കിടെയാണ് ഇക്കാര്യം വ്യക്തമാക്കിയത്. വിചാരണ കോടതി ജഡ്ജിക്കെതിരെ മുന്‍പ് ഉന്നയിച്ച ആരോപണങ്ങളില്‍ ഉറച്ചുനില്‍ക്കുന്നുണ്ടോയെന്ന് കോടതി ചോദിച്ചിരുന്നു.ഇതിന് മറുപടിയായാണ് ഇല്ലെന്ന് നടിക്ക് വേണ്ടി ഹാജരായ അഡ്വ ടി.ബി. മിനി അറിയിച്ചത്.
മുന്‍പ് സ്വീകരിച്ചിരുന്ന നിലപാടുകളില്‍ നിന്ന് വിചാരണാക്കോടതി മാറിയെന്നും പരാതിക്കാരിക്ക് നീതിപൂര്‍വമായ പരിഗണന കിട്ടുന്നുണ്ടെന്നും അതിനാലാണ് ഹൈക്കോടതിയില്‍ നിലപാട് മാറ്റിയതെന്നും അഡ്വ ടി.ബി. മിനി മാധ്യമങ്ങളോട് പ്രതികരിച്ചു.
വിചാരണാക്കോടതി ജഡ്ജിക്കെതിരെ ഗുരുതുര ആരോപണം ഉന്നയിച്ച് അതിജീവിത നേരത്തെ സുപ്രീം കോടതി വരെ പോയിരുന്നു. കോടതി മാറ്റണമെന്ന ആവശ്യം പക്ഷെ, ഹൈക്കോടതിയും സുപ്രീം കോടതിയും തള്ളിയതിനെ തുടര്‍ന്ന് ജഡ്ജി ഹണി വര്‍ഗീസിന് മുന്നില്‍ തന്നെ വിചാരണ തുടരുകയായിരുന്നു.
