നാഗ്പൂര്: ഒരു സ്വതന്ത്ര രാഷ്ട്രത്തില് ഈ അച്ചടക്കം ദേശസ്നേഹത്തിന്റെ പ്രകടനമാണെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത്. എല്ലാ നന്മകളെയും എതിര്ക്കുന്ന ചിലരുണ്ട്. കള്ച്ചറല് മാര്ക്സിസ്റ്റുകള് അഥവാ വോക്കിസ്റ്റുകള് എന്നാണ് അവരെ വിളിക്കുന്നത്. വിവാഹം സംസ്കാരം തുടങ്ങി എല്ലാ നല്ല സംവിധാനങ്ങളെയും എതിര്ക്കും. മറ്റുള്ളവര്ക്ക് വേണ്ടിയാണ് പ്രവര്ത്തിക്കുന്നത് എന്ന് തെറ്റിദ്ധാരണ പരത്തി ഏതെങ്കിലും പ്രത്യയ ശാസ്ത്രത്തിന്റെ കുപ്പായത്തില് ഒളിക്കും. മാധ്യമങ്ങളെയും അക്കാദമികളെയും കൈയിലെടുത്ത് വിദ്യാഭ്യാസം, സാംസ്കാരികം, രാജനീതി തുടങ്ങി എല്ലാറ്റിലും സമാജത്തിലുടനീളം തെറ്റിദ്ധാരണയും ഭിന്നതയും സൃഷ്ടിക്കും. അപവാദപ്രചരണമാണ് അവരുടെ കാര്യപദ്ധതി. അരാജകത്വത്തിനും അഴിഞ്ഞാട്ടത്തിനും പ്രചാരവും അംഗീകാരവും നല്കലാണ് അവര് ചെയ്യുന്നത്, ആര്എസ്എസ് വിജയദശമി മഹോത്സവത്തില് സംസാരിക്കവെ അദ്ദേഹം പറഞ്ഞു.
മണിപ്പൂരിലെ അവസ്ഥയ്ക്ക് പിന്നില് ഒരുപാട് സംശയങ്ങളുണ്ട്. എന്തുകൊണ്ടാണ് പൊടുന്നനെ ഇങ്ങനെ ഒരു സാഹചര്യമുണ്ടായത്. സംഘര്ഷത്തെ വര്ഗീയവല്ക്കരിക്കാനുള്ള ശ്രമം എന്തിന് ആര് ചെയ്തു? വര്ഷങ്ങളായി അവിടെ സമഭാവത്തോടെ സേവനം ചെയ്യുന്ന ആര്എസ്എസ് പോലുള്ള സംഘടനയെ ഒരു കാരണവുമില്ലാതെ ഇതിലേക്ക് വലിച്ചിടാന് ശ്രമിച്ചതിന് പിന്നില് ആരുടെ സ്വാര്ത്ഥതയാണ്? അശാന്തി സൃഷ്ടിക്കുന്നത് കൊണ്ട് ലാഭമുണ്ടാകുന്ന ഏതെങ്കിലും വിദേശ ഭരണകൂടത്തിന്റെ താത്പര്യങ്ങളിതിലുണ്ടോ? തെക്ക് കിഴക്കന് ഏഷ്യയില് വര്ഷങ്ങളായുള്ള ഭൂ രാഷ്ട്രീയ പ്രശ്നങ്ങള് ഇതിന് കാരണമായിട്ടുണ്ടോ? രാജ്യത്ത് ശക്തമായ ഭരണകൂടമുണ്ടായിട്ടും ആരുടെ ബലത്തിലാണ് ഇത്രയും കാലമായി അവിടെ സംഘര്ഷം തുടരുന്നത്, തുടങ്ങി നിരവധി ചോദ്യങ്ങളുണ്ട്. സംഘര്ഷത്തിലേര്പ്പെട്ടവര് സമാധാനത്തിന്റെ വഴിയില് ചില നീക്കങ്ങള് നടത്തുന്ന സമയത്ത് പുതിയ പ്രശ്നങ്ങള് കുത്തിപ്പൊക്കുകയാണ്. ഈ പ്രശ്നത്തിന് പരിഹാരം കാണാന് സര്ക്കാരുകളുടെ ഇച്ഛാശക്തി മാത്രം പോരാതെ വരും, ജനങ്ങളിലുടലെടുത്ത അവിശ്വാസം പരിഹരിക്കാന് അവരെ ബോധവത്കരിക്കാന് പ്രാപ്തരായ സജ്ജനങ്ങളുടെ നേതൃത്വം വേണം, മോഹന് ഭാഗവത് പറഞ്ഞു.
ഏത് സാഹചര്യത്തിലും, എത്ര അന്യായമായാലും, ക്രമസമാധാനവും അച്ചടക്കവും ഭരണഘടനയും നിര്ബന്ധമായും പാലിക്കണം. പ്രകോപനപരമായ പ്രചാരണങ്ങളിലും തുടര്ന്നുയരുന്ന ആരോപണ, പ്രത്യാരോപണങ്ങളിലും കുടുങ്ങരുത്. സത്യവും ആത്മീയതയും പ്രചരിപ്പിക്കാന് മാധ്യമങ്ങളെ പ്രേരിപ്പിക്കണം. നിയമങ്ങളെയും ഭരണഘടനയെയും സമാജത്തെയും സംരക്ഷിക്കുന്നതിന് ആദ്യം ചെയ്യേണ്ടത് അതിനായുള്ള സര്ക്കാരിന്റെ ഉചിതമായ നടപടികളോട് സഹകരിക്കുക എന്നതാണ്.
ലോക്സഭാ തെരഞ്ഞെടുപ്പാണ് വരുന്നത്. വികാരങ്ങള് ആളിക്കത്തിച്ച് വോട്ട് നേടാനുള്ള ശ്രമങ്ങള് ആശാസ്യമല്ലെങ്കിലും അത് നടക്കുന്നു. സമൂഹത്തെ ഭിന്നിപ്പിക്കുന്ന ഇത്തരം കാര്യങ്ങളില് നിന്ന് ഒഴിവാകണം. രാജ്യത്തിന്റെ ഐക്യം, അഖണ്ഡത, അസ്മിത, വികസനം തുടങ്ങിയ വിഷയങ്ങള് പരിഗണിച്ച് എല്ലാവരും വോട്ട് രേഖപ്പെടുത്തണം, സര്സംഘചാലക് പറഞ്ഞു.
പരിപാടിയില് ഗായകന് ശങ്കര് മഹാദേവന് മുഖ്യാതിഥിയായി. സര്കാര്യവാഹ് ദത്താത്രേയ ഹൊസബാളെ, വിദര്ഭ പ്രാന്തസംഘചാലക് രാംജി ഹര്കരെ, നാഗ്പൂര് മഹാനഗര് സംഘചാലക് രാജേഷ് ലോയ, സഹസംഘചാലക് ശ്രീധര് ഗാഡ്ഗെ എന്നിവര് പങ്കെടുത്തു.
