കണ്ണൂർ: ഒന്നുറക്കെ നിലവിളിക്കാൻ പോലും സാധിക്കാതെയാണ് ഷജീഷും അഭിലാഷും അഗ്നിക്കിരയായത്. ആറാംമൈൽ മൈതാനപ്പള്ളിക്ക് സമീപമായാണ് ഇരുവരും കത്തിയമർന്നത്. ഇവർ സഞ്ചരിച്ചിരുന്ന ഓട്ടോറിക്ഷയിൽ ബസ് ഇടിച്ച ഉടൻ തന്നെ തീ ആളിപ്പടരുകയായിരുന്നു. അപകടം കണ്ട് ഓടിയെത്തിയവർക്ക് നിസ്സഹായരായി നോക്കി നിൽക്കാനെ സാധിച്ചുള്ളൂ.
ഇരുവരുടെയും മൃതദേഹം തിരിച്ചറിയാൻ സാധിക്കാത്ത വിധം കത്തിപ്പോയിരുന്നു. തലശ്ശേരി ഭാഗത്ത് നിന്നും എത്തിയ ബസ് ഓട്ടോയിൽ ഇടിക്കുകയായിരുന്നു. ഓട്ടോ മറിയുകയും തീ ആളിപ്പടരുകയുമായിരുന്നു. ഏറെ സമയമെടുത്താണ് മരിച്ച രണ്ട് പേരെയും തിരിച്ചറിഞ്ഞത്. ഓട്ടോയുടെ രജിസ്‌ട്രേഷൻ നമ്പർ പരിശോധിച്ചാണ് അഭിലാഷ് ആണെന്ന് കണ്ടെത്തിയത്. അഭിലാഷിന്റെ ഓട്ടോയിലായിരുന്നു ഷജീഷ് സ്ഥിരമായി സഹോദരിയുടെ വീട്ടിൽ എത്താറുണ്ടായിരുന്നത്.
സഹോദരിയുടെ വീടിന് 100 മീറ്റർ അകലെയാണ് അപകടമുണ്ടായത്. ബസ് അമിതവേഗത്തിലായിരുന്നുവെന്ന് നാട്ടുകാർ പറയുന്നു. അഞ്ച് മാസം മുമ്പാണ് അഭിലാഷ് പുതിയ ഓട്ടോ എടുക്കുന്നത്.
