സാധാരണക്കാര്ക്ക് വേണ്ടിയൊരുങ്ങുന്ന പുഷ്പുള് വന്ദേ ഭാരത് ട്രെയിനിന്റെ ചിത്രങ്ങള് പങ്കുവെച്ച് കേന്ദ്ര റെയില്വേ മന്ത്രി അശ്വിനി വൈഷ്ണവ്. അദ്ദേഹത്തിന്റെ വാട്സ്ആപ്പ് ചാനല് വഴിയായിരുന്നു ചിത്രങ്ങള് പങ്കിട്ടത്. ഓറഞ്ച്, ഗ്രേ നിറങ്ങളിലാണ് പുതിയ പുഷ് പുള് ലോക്കോമോട്ടീവുകള് റെയില്വേ പുറത്തിറക്കുക. വന്ദേഭാരതിന് സമാനമായ രൂപകല്പനയാണ് ഇതിന് നല്കിയിരിക്കുനന്ത്.
ചിത്തരഞ്ജന് ലോക്കോമോട്ടീവ് വര്ക്ക്സ് ആണ് പുഷ്പുള് ലോക്കോമോട്ടീവിന്റെ നിര്മ്മാണ ചുമതല വഹിക്കുന്നത്. ചെന്നൈയിലെ ഇന്റഗ്രല് കോച്ച് ഫാക്ടറിയിലാണ് നവീകരിച്ച ട്രെയിന് നിര്മ്മിക്കുന്നത്. ഇതില് രണ്ടാം ക്ലാസ്3 ടയര് സ്ലീപ്പര് കോച്ചുകളും രണ്ടാം ക്ലാസ് അണ് റിസര്വ്ഡ് കോച്ചുകളുമാണ് സജ്ജീകരിക്കുന്നത്.
വന്ദേഭാരത് എക്സ്പ്രസിന്റെ നിരവധി സവിശേഷതകള് ഉണ്ടെങ്കിലും പുഷ്പുള് സാങ്കേതിക വിദ്യ ഉപയോഗിച്ച് ഇരുവശത്തും ലോക്കോമോട്ടീവ് ഘടിപ്പിച്ചാണ് പ്രവര്ത്തിക്കുന്നത്. ഇത് യാത്രസമയം ഗണ്യമായി കുറയ്ക്കും. സാധാരണക്കാര്ക്ക് വേണ്ടി പുതിയ ട്രെയിന് ഈ മാസം പകുതിയോടെ ഐസിഎഫില് തയാറാകും. ഈ മാസം അവസാനത്തോടെ പരീക്ഷണ ഓട്ടത്തിന് സജ്ജമാകുമെന്നാണ് റിപ്പോര്ട്ടുകള്.
