സംവിധായകന്‍ വിശാല്‍ ഭരദ്വാജ് അടുത്തിടെ ലോസാഞ്ചലസില്‍ എത്തിയപ്പോള്‍ സുഹൃത്തായ നടി പ്രിയങ്ക ചോപ്രയെ അവരുടെ വീട്ടിലെത്തി കണ്ടു.വിശാലിന് പ്രിയങ്കയും മകള്‍ മാള്‍ട്ടി മേരി ചോപ്ര ജോനാസും ചേര്‍ന്ന് ഉഗ്രന്‍ വരവേല്‍പാണ് നല്‍കിയത്.
മൂവരും ചേര്‍ന്നുളള ചിത്രങ്ങള്‍ പ്രിയങ്ക ഇന്‍സ്റ്റാഗ്രാമില്‍ പങ്കുവച്ചു.ഗോള്‍ഫ് കാര്‍ട്ടില്‍ സഞ്ചരിക്കുന്ന ഫോട്ടോയില്‍ മൂന്നുപേരും ആഹ്ലാദത്തോടെയാണ് കാണപ്പെടുന്നത്.
കറുപ്പ് ടോപ്പും ഓറഞ്ച് ഷര്‍ട്ടിനൊപ്പം കറുത്ത ഷോര്‍ട്സും ആണ് പ്രിയങ്ക ധരിച്ചിരിക്കുന്നത്. വെളുത്ത തൊപ്പിയും ഓറഞ്ച് വസ്ത്രവും സണ്‍ഗ്ലാസും ധരിച്ച് മാള്‍ട്ടി പ്രിയങ്കയുടെ മടിയിലിരിക്കുന്നു. ഗ്രേ നിറമുളള ഷര്‍ട്ടും ഇരുണ്ട പാന്റും ധരിച്ച് വിശാല്‍ മനോഹരമായി പുഞ്ചിരിക്കുന്നു. വിശാല്‍ ഭരദ്വാജ് സര്‍പ്രൈസ് വിസിറ്റ് എന്നാണ് ഫോട്ടോകള്‍ക്കൊപ്പം പ്രിയങ്ക കുറിച്ചിട്ടുളളത്.
കഴിഞ്ഞ വര്‍ഷം പ്രിയങ്കയുടെ ന്യൂയോര്‍ക്കിലെ റെസ്റ്റോറന്റ് സോനയിലും വിശാല്‍ സന്ദര്‍ശനം നടത്തിയിരുന്നു.
കാനഡയില്‍ ഖുഫിയ എന്ന ചിത്രത്തിന്റെ ഷൂട്ടിംഗിനിടെ പ്രിയങ്ക തന്നെ സഹായിച്ചതെങ്ങനെയെന്ന് അടുത്തിടെ വിശാല്‍ ഒരു അഭിമുഖത്തില്‍ വെളിപ്പെടുത്തി. 2022 ല്‍ ഖുഫിയയുടെ ചിത്രീകരണത്തിനായി കാനഡയിലേക്ക് പോയപ്പോഴാണ് സംഭവം. കോവിഡ് മൂന്നാം തരംഗത്തിന് ശേഷം വിസയുടെ കാര്യത്തില്‍ അനിശ്ചിതത്വത്തമുണ്ടായിരുന്നു. 40 വിസയ്‌ക്ക് അപേക്ഷിച്ചിട്ടും ലഭിച്ചത് 9 വിസകള്‍ മാത്രം. അവസാന നിമിഷം വരെ കൂടുതല്‍ ലഭിക്കുമെന്ന് ഞങ്ങള്‍ പ്രതീക്ഷിച്ചിരുന്നു. എന്നാല്‍ അത് സംഭവിച്ചില്ല.
ഈ ഘട്ടത്തില്‍ സുഹൃത്ത് പ്രിയങ്കയെ വിളിച്ചു. ആവശ്യമുള്ള ക്രൂവിനെ ഒറ്റരാത്രികൊണ്ട് സംഘടിപ്പിക്കാന്‍ പ്രിയങ്ക സഹായിച്ചു. ഷൂട്ടിംഗ് നിശ്ചയിച്ച പോലെ പൂര്‍ത്തിയാക്കി മടങ്ങിയെന്നും വിശാല്‍ ഭരദ്വാജ് പറഞ്ഞു.
വിശാല്‍ സംവിധാനം നിര്‍വഹിച്ച് 2009ല്‍ പുറത്തിറങ്ങിയ കമിനേ എന്ന ചിത്രത്തിലും 2011ല്‍ പുറത്തിറങ്ങിയ 7 ഖൂന്‍ മാഫിലും പ്രിയങ്ക അഭിനയിച്ചിരുന്നു.
ഭര്‍ത്താവ് നിക്ക് ജോനാസിനും മകള്‍ മാള്‍ട്ടിക്കുമൊപ്പം ലോസാഞ്ചലസിലാണ് പ്രിയങ്ക താമസിക്കുന്നത്. നിക്ക് ഇപ്പോള്‍ ജോനാസ് ബ്രദേഴ്‌സിനൊപ്പം ഒരു സംഗീത പര്യടനത്തിലാണ്. അതേസമയം പ്രിയങ്ക ഹോളിവുഡ് എഴുത്തുകാരുടെയും അഭിനേതാക്കളുടെയും സമരം അവസാനിക്കാന്‍ കാത്തിരിക്കുകയാണ്.ഇതിന് ശേഷം ചിത്രങ്ങളില്‍ അഭിനയിക്കും.
