തൃശ്ശൂര്: കെഎസ്എഫ്ഇ മൊബൈല് ആപ്പായ പവറിന്റെ ലോഞ്ചിങ്ങും പുതിയ പദ്ധതിയായ ഡയമണ്ട് ചിട്ടി 2.0ന്റെയും ഉദ്ഘാടനം നാളെ രാവിലെ 9.30ന് ധനമന്ത്രി അഡ്വ. കെ.എന്. ബാലഗോപാല് നിര്വഹിക്കും. തിരുവനന്തപുരം റസിഡന്സി ടവറിലെ പരിപാടിയില് ഗതാഗതമന്ത്രി ആന്റണി രാജു അദ്ധ്യക്ഷത വഹിക്കും. കെഎസ്എഫ്ഇ ചെയര്മാന് കെ. വരദരാജനും മാനേജിങ് ഡയറക്ടര് ഡോ.എസ്.കെ. സനിലും ഡയറക്ടര്മാരും ഉന്നതോദ്യോഗസ്ഥരും ജീവനക്കാരുടെ സംഘടനാ പ്രതിനിധികളും പങ്കെടുക്കും. കെഎസ്എഫ്ഇ പവറിലൂടെ ചിട്ടി മാസത്തവണ അടയ്ക്കാനും. പ്രോക്സി നല്കാനും അക്കൗണ്ട് പരിശോധിക്കാനും സാധിക്കും.
ഡയമണ്ട് ചിട്ടി 2.0ല് അംഗമാകുന്ന മുപ്പതു പേര് വരുന്ന ഓരോ ഗ്രൂപ്പിലും ഒരാള്ക്ക് 3000 രൂപയുടെ ഗിഫ്റ്റ് ചെക്ക് ഉറപ്പാക്കുന്ന വിധത്തില് സമ്മാന പദ്ധതിയുണ്ട്. ബംപര് സമ്മാനമായി ഒരാള്ക്ക് 15 ലക്ഷം രൂപയുടെ ഡയമണ്ട് ആഭരണങ്ങളും രണ്ടാം സമ്മാനമായി 34 പേര്ക്ക് 2.5 ലക്ഷം രൂപയുടെ ഡയമണ്ട് ആഭരണങ്ങളും ലഭിക്കുന്നു. ആകെ നാല് കോടി രൂപയുടെ സമ്മാനങ്ങള് ലഭിക്കും.
