കോട്ടയം: റബ്ബര്‍ ഉത്പാദകരാജ്യങ്ങളുടെ അന്താരാഷ്‌ട്ര സംഘടനയായ എഎന്‍ആര്‍പിസി (അസോസിയേഷന്‍ ഓഫ് നാച്ചുറല്‍ റബ്ബര്‍ പൊഡ്യൂസിങ് കണ്‍ട്രീസ്) യുടെ 13 ാമത് രാജ്യാന്തരവാര്‍ഷിക റബ്ബര്‍ സമ്മേളനം ഗുവാഹതിയില്‍ തുടങ്ങി. റബ്ബര്‍ ബോര്‍ഡ് ചെയര്‍മാന്‍ ഡോ. സവാര്‍ ധനാനിയ ഉദ്ഘാടനം ചെയ്തു. റബ്ബര്‍ മേഖലയുമായി ബന്ധപ്പെട്ട പൊതുവിഷയങ്ങള്‍ പരിഹരിക്കാന്‍ യോജിച്ച നയരൂപവത്കരണത്തിനായി എഎന്‍ആര്‍പി
സി മുന്‍കൈ എടുക്കണമെന്ന് ഡോ. ധനാനിയ ഉദ്ഘാടന പ്രസംഗത്തില്‍ പറഞ്ഞു.
റബ്ബര്‍ ബോര്‍ഡ് എക്‌സി. ഡയറക്ടര്‍ എം. വസന്തഗേശന്‍ പ്രസംഗിച്ചു. എഎന്‍ആര്‍പിസിയുടെ ചെയര്‍മാനും മലേഷ്യന്‍ റബ്ബര്‍ ബോര്‍ഡിന്റെ ഡയറക്ടര്‍ ജനറലുമായ ഡോ. സരോയിസ്സാനി മൊഹമ്മദ് നോര്‍ വാര്‍ഷിക റിപ്പോര്‍ട്ട് അവതരിപ്പിച്ചു. എഎന്‍ആര്‍പിസിയുടെ സെക്രട്ടറി ജനറല്‍ റ്റോ ഹെങ് ഗുവാന്‍, റബ്ബര്‍ ബോര്‍ഡ് വൈസ് ചെയര്‍മാന്‍ കെ.എ. ഉണ്ണിക്കൃഷ്ണന്‍, എക്‌സി. കമ്മിറ്റി അംഗം എന്‍. ഹരി എന്നിവരും സമ്മേളനത്തില്‍ സന്നിഹിതരായിരുന്നു.
പാനല്‍ ചര്‍ച്ചകളില്‍ യഥാക്രമം കേരളാ റബ്ബര്‍ ലിമിറ്റഡിന്റെ സിഎംഡി ഷീല തോമസ്, ഇന്റര്‍നാഷണല്‍ റബ്ബര്‍ സ്റ്റഡി ഗ്രൂപ്പിന്റെ സെക്രട്ടറി ജനറല്‍ പ്രൊഫ. ജോസഫ് അഡലേഗാന്‍ എന്നിവര്‍ മോഡറേറ്റര്‍മാര്‍ ആയിരുന്നു. ജി 20 യുടെ സൈഡ് മീറ്റിങ് കൂടിയായി ഈ പരിപാടിയെ കേന്ദ്ര സര്‍ക്കാര്‍ അംഗീകരിച്ചിട്ടുണ്ട്.
