മലപ്പുറം: സിപിഎം നേതാവ് കെ. അനില് കുമാറിന്റെ പ്രസ്താവനയ്ക്കെതിരേ സമസ്ത. വോട്ട് രാഷ്ട്രീയത്തിന് വേണ്ടിയുള്ള സിപിഎം നിലപാടാണ് ഇതിലൂടെ വ്യക്തമാക്കിയിരിക്കുന്നതെന്ന് സമസ്ത നേതാവ് അബ്ദു സമദ് പൂക്കോട്ടൂര്. തട്ടം തട്ടി മാറ്റൽ പുരോഗതി അല്ല അധോഗതിയാണെന്ന് അദ്ദേഹം വിമർശിച്ചു.
കമ്മ്യൂണിസ്റ്റ് പാർട്ടി കേരളത്തിൽ വന്നതിന്റെ കൂടി ഫലമായാണ് മലപ്പുറത്ത് തട്ടം വേണ്ടെന്ന് പറയുന്ന പെൺകുട്ടികൾ ഉണ്ടായതെന്നെന്ന അനിൽകുമാറിന്റെ പ്രസ്താവന. ഈ പ്രസ്താവനയിലൂടെ സിപിഎമ്മിന്റെ ഇരട്ടത്താപ്പാണ് പുറത്തായത്. കമ്മ്യൂണിസത്തിന്റെ അടിസ്ഥാനം മതനിഷേധമെന്നും അബ്ദു സമദ് പ്രതികരിച്ചു.
വോട്ട് രാഷ്ട്രീയത്തിന് വേണ്ടി അനില് കുമാര് സ്വന്തം അഭിപ്രായമാണ് പറഞ്ഞതെന്ന് നാളെ പറഞ്ഞേക്കാം. എന്നാല് സിപിഎം നിലപാടാണ് ഇതിലൂടെ വ്യക്തമാക്കിയിരിക്കുന്നത്.
വ്യക്തിപരമായ അഭിപ്രായമായി അതിനെ ചുരുക്കിയാലും പാർട്ടിയെ സംബന്ധിച്ചിടത്തോളം പാർട്ടിയുടെ ഉത്തരവാദപ്പെട്ട സ്ഥാനത്തിരിക്കുന്ന ഒരാൾ, ഞങ്ങൾ വരുത്തിയ പുരോഗതിയാണ് അതെന്നു പറയുമ്പോൾ അദ്ദേഹത്തിന്റെ മനസ്സിൽ അതു സ്വന്തം ആശയമല്ല, അതു പാർട്ടിയുടെ ആശയമാണെന്ന് അദ്ദേഹം കുറ്റപ്പെടുത്തി.
നേരത്തെ അനില് കുമാറിന്റെ പ്രസ്താവനക്കെതിരേ മുന് മന്ത്രിയും എംഎല്എയുമായ കെ.ടി. ജലീലും രംഗത്തെത്തിയിരുന്നു. കമ്മ്യൂണിസ്റ്റ് പാര്ട്ടി കേരളത്തില് ഒരു മുസ്ലിം പെണ്കുട്ടിയേയും തട്ടമിടാത്തവളാക്കി മാറ്റിയിട്ടില്ലെന്നായിരുന്നു ജലീലിന്റെ പ്രതികരണം. വ്യക്തിയുടെ അഭിപ്രായം പാര്ട്ടിയുടേതായി അവതരിപ്പിക്കുന്നത് തെറ്റിദ്ധാരണയ്ക്ക് ഇടവരുത്തുമെന്നും ജലീല് പ്രതികരിച്ചു.
നിശാഗന്ധി ഓഡിറ്റോറിയത്തില് സി. രവിചന്ദ്രന്റെ നേതൃത്വത്തില് യുക്തിവാദ സംഘടനയായ എസ്സന്സ് ഗ്ലോബല് സംഘടിപ്പിച്ച ലിറ്റ്മസ് 23 നാസ്തിക സമ്മേളനത്തിലാണ് അനില് കുമാറിന്റെ പരാമര്ശം.
