തിരുവനന്തപുരം: കാമുകനെ വിഷം കൊടുത്ത് കൊന്ന കേസിലെ മുഖ്യപ്രതി ഗ്രീഷ്മ വിചാരണ കോടതി മാറ്റണമെന്ന ആവശ്യവുമായി സുപ്രീം കോടതിയില്‍. വിചാരണ തമിഴ്‌നാട്ടിലേക്ക് മാറ്റണമെന്നാണ് ആവശ്യം.
കന്യാകുമാരിയിലെ ജെഎംഎഫ്‌സി കോടതിയിലേക്ക് മാറ്റണമെന്നാണ് ഹര്‍ജിയിലെ ആവശ്യം. കുറ്റകൃത്യം നടന്നത് തമിഴ്‌നാട്ടിലാണെന്നും അതിനാല്‍ ആ സംസ്ഥാനത്ത് തന്നെ വിചാരണ വേണമെന്നുമാണ് ആവശ്യം.അഭിഭാഷകന്‍ ശ്രീറാം പാറക്കാട്ടാണ് ഹര്‍ജി സമര്‍പ്പിച്ചത്. ഗ്രീഷ്മയ്‌ക്കൊപ്പം കേസിലെ മറ്റു പ്രതികളും സുപ്രീംകോടതിയെ സമീപിച്ചിട്ടുണ്ട്. കന്യാകുമാരി ജില്ലയിലെ പൂമ്പള്ളിക്കോണത്താണ് പ്രതികളുടെ വീട്.
നിലവില്‍ നെയ്യാറ്റിന്‍കര അഡീഷണല്‍ സെക്ഷന്‍സ് കോടതിയിലാണ് കേസ് നടപടികള്‍ പുരോഗമിക്കുന്നത്.
വിചാരണ കേരളത്തില്‍ നടക്കുന്നത് പ്രതികള്‍ക്ക് നീതി ഉറപ്പാക്കാന്‍ തടസമാകുമെന്ന് സുപ്രീം കോടതിയല്‍ സമര്‍പ്പിച്ച ഹര്‍ജിയില്‍ പറയുന്നു.
തമിഴ്നാട് പളുകലിലുള്ള വീട്ടില്‍ വച്ച് 2022 ഒക്ടോബര്‍ 14ന് ഗ്രീഷ്മ ഷാരോണിന് കഷായത്തില്‍ വിഷം കലര്‍ത്തി നല്‍കിയെന്നാണ് പൊലീസ് കണ്ടെത്തിയത്. സാധാരണ മരണമെന്നായിരുന്നു ആദ്യ നിഗമനം. ഷാരോണിന്റെ വീട്ടുകാരുടെ ആവശ്യത്തെ തുടര്‍ന്ന് പിന്നീട് പ്രത്യേക സംഘം നടത്തിയ അന്വേഷണത്തിലാണ് കൊലപാതകമെന്ന് വ്യക്തമായത്.
