കൊച്ചി: എസ്കലേറ്ററിന്റെ സമീപത്തുള്ള വിടവ് വഴി വീണ് ശുചീകരണ തൊഴിലാളിക്ക് ദാരുണാന്ത്യം. കളമശേരി മെഡിക്കല് കോളജിന് സമീപത്തുള്ള കേരള സ്റ്റാര്ട്ടപ്പ് മിഷന്റെ കെട്ടിടത്തിലാണ് സംഭവം. ചേര്ത്തല വളമംഗലം സ്വദേശി മേരി (49) ആണ് മരിച്ചത്.
ഇന്ന് രാവിലെ എട്ടുമണിയോടെയായിരുന്നു സംഭവം. എസ്കലേറ്ററിന്റെ സമീപത്തുള്ള വിടവുവഴി ഗ്രൗണ്ട് ഫ്ലോറില്നിന്ന് താഴത്തെ നിലയിലേക്കു മേരി വീഴുകയായിരുന്നു. ഉടന് തന്നെ മെഡിക്കല് കോളജ് ആശുപത്രിയില് എത്തിച്ചെങ്കിലും മരണത്തിന് കീഴടങ്ങുകയായിരുന്നു. സ്റ്റാര്ട്ട് അപ്പ് മിഷന്റെ കെട്ടിടത്തില് വനിതാ സ്റ്റാര്ട്ട് അപ്പ് സമ്മിറ്റ് ഇന്ന് നടക്കാനിരിക്കുകയായിരുന്നു. ഇതുമായി ബന്ധപ്പെട്ട് ശുചീകരണം നടക്കവേയാണു അപകടം.
