ഇടുക്കി: ചാത്തനേറിൽ പൊറുതി മുട്ടി കല്ലാർകുട്ടി നിവാസികൾ. രാത്രി കാലങ്ങളിൽ വീടുകൾക്ക് നേരെ കല്ലെറിയുന്ന സമൂഹ്യവിരുദ്ധരെ പിടികൂടാൻ പോലീസ് ശ്രമിക്കുന്നില്ലെന്നാണ് പ്രദേശവാസികളുടെ ആരോപണം. സംഭവത്തിൽ പ്രദേശവാസികൾ ജില്ലാ പോലീസ് മേധാവിയെ സമീപിച്ചിരിക്കുകയാണ്.
കഴിഞ്ഞ ഒമ്പത് മാസങ്ങളോളമായി പ്രദേശവാസികൾ ഈ പ്രശ്നം നേരിട്ടുകൊണ്ടിരിക്കുകയാണ്. കല്ലാർകുട്ടി നായ്കുന്ന് ഭാഗത്ത് ആളുകൾക്ക് രാത്രിയായാൽ വീട്ടിൽ കിടന്ന് ഉറങ്ങാൻ സാധിക്കില്ല. വീടുകൾക്കും കടകൾക്കും നേരെയാണ് ആക്രമണം നടക്കുന്നത്. ഷീറ്റുകൾ പൊട്ടുന്നത് മാറ്റിയിടുന്നതിലും ഫലമില്ലാത്ത അവസ്ഥയാണ്.
പോലീസ് അന്വേഷണം മന്ദഗതിയിലാണെന്നാണ് പ്രദേശവാസികളുടെ ആരോപണം. ഉടൻ പരിഹാരം ആവശ്യമെന്നാണ് പ്രദേശവാസികൾ പറയുന്നത്. എന്നാൽ അന്വേഷണം പുരോഗമിക്കുകയാണെന്നാണ് അടിമാലി പോലീസിന്റെ വാദം.
