ആലപ്പുഴ: ഹയര്‍ സെക്കന്‍ഡറി ഒന്നും രണ്ടും വര്‍ഷ പൊതുപരീക്ഷയുടെ മൂല്യനിര്‍ണയ ജോലിയുടെ പ്രതിഫലം തടഞ്ഞു വച്ചിട്ട് ആറ് മാസം പിന്നിടുന്നു. പ്ലസ് വണ്‍, പ്ലസ് ടു പൊതുപരീക്ഷകളുടെ ഫലം പ്രഖ്യാപിച്ച് മാസങ്ങള്‍ പിന്നിടുമ്പോഴും 2023 ഏപ്രിലില്‍ നടന്ന ഹയര്‍ സെക്കന്‍ഡറി പരീക്ഷകളുടെ മൂല്യനിര്‍ണയത്തിന്റെ പ്രതിഫലമാണ് ഇപ്പോഴും തടഞ്ഞുവച്ചിരിക്കുന്നത്.
ഇംപ്രൂവ്‌മെന്റ് പരീക്ഷയുടെ മുഴുവന്‍ ഫീസും സ്വീകരിച്ച് ഒക്ടോബര്‍ ഒമ്പതിന് പരീക്ഷ നടക്കാനിരിക്കെയാണിത്. സംസ്ഥാനത്തുടനീളം 80 ക്യാമ്പുകളിലായി നടന്ന ഹയര്‍സെക്കന്‍ഡറി കേന്ദ്രീകൃത മൂല്യനിര്‍ണയത്തിന്റെ പ്രതിഫലം നല്‍കുന്നതിന് 30.4 കോടി രൂപയാണ് വേണ്ടത്. എന്നാല്‍ 8.9 കോടി രൂപ മാത്രമാണ് അനുവദിച്ചത്. 25 ശതമാനം അദ്ധ്യാപകര്‍ക്ക് മാത്രമാണ് പ്രതിഫലം ലഭിച്ചത്
അതേസമയം എസ്എസ്എല്‍സി മൂല്യനിര്‍ണയത്തിന്റെ മുഴുവന്‍ പ്രതിഫലവും അതതു സമയം വിതരണം ചെയ്തിട്ടുണ്ട്. പരീക്ഷകള്‍ക്കുള്ള അറിയിപ്പ് പുറത്തിറങ്ങി രണ്ടോ മൂന്നോ ദിവസത്തിനുള്ളില്‍ യുദ്ധകാലടിസ്ഥാനത്തിലാണ് ഹയര്‍ സെക്കന്‍ഡറി വിദ്യാര്‍ഥികളില്‍ നിന്നു ഉയര്‍ന്ന തോതിലുള്ള പരീക്ഷാഫീസ് പിരിച്ചെടുക്കുന്നത്. ഒന്നും രണ്ടും വര്‍ഷ പരീക്ഷകള്‍ക്ക് യഥാക്രമം 240, 270 രൂപ വിതവും സേ പരീക്ഷയ്‌ക്ക് ഒരു പേപ്പറിന് 150 രൂപ വീതവും പുനര്‍മൂല്യനിര്‍ണയത്തിന് പേപ്പറൊന്നിന് 500 രൂപയുമാണ് പിരിക്കുന്നത്. എന്നിട്ടും പ്രതിഫല കാര്യത്തില്‍ മാസങ്ങളായി തുടരുന്ന കാലതാമസം, ഹയര്‍ സെക്കന്‍ഡറി മേഖലയോടുള്ള അവഗണനയാണെന്ന് അധ്യാപക സംഘടനകള്‍ ചൂണ്ടിക്കാട്ടുന്നു.
ഹയര്‍ സെക്കന്‍ഡറി മേഖലയില്‍ മാസങ്ങളായി പ്രതിഫലം തടഞ്ഞുവയ്‌ക്കുന്ന നടപടി അംഗീകരിക്കാനാകില്ലെന്ന് അധ്യാപകര്‍ പറയുന്നു. പരീക്ഷാ ജോലിയുമായി ബന്ധപ്പെട്ട് പിരിച്ചെടുക്കുന്ന ഫീസ് വകമാറ്റുന്നതിന്റെ ഭാഗമായാണ് പ്രതിഫലം നല്‍കാനാവാത്ത സാഹചര്യം ഉണ്ടായതെന്ന് ഫെഡറേഷന്‍ ഓഫ് ഹയര്‍ സെക്കന്‍ഡറി ടീച്ചേഴ്‌സ് അസോസിയേഷന്‍സ് കുറ്റപ്പെടുത്തി.
