കോട്ടയം: ജില്ലയിലെ വിവിധ ഇടങ്ങളില്‍ കവര്‍ച്ചയ്‌ക്ക് ആസൂത്രണം ചെയ്തു വരവേ വിവിധ കേസുകളില്‍ ഉള്‍പ്പെട്ട സ്ഥിരം കുറ്റവാളികളായ അഞ്ചു പേരെ പോലീസ് അറസ്റ്റ് ചെയ്തു. ചങ്ങനാശേരി അംബികാപുരം ഭാഗത്ത് മുളയ്‌ക്കല്‍ വീട്ടില്‍ സിനാജ്.എം (42), പത്തനംതിട്ട മല്ലപ്പള്ളി പുന്നവേലി കുളത്തുംകല്‍ കവല മുറ്റത്തുമാക്കല്‍ വീട്ടില്‍ മണിക്കുട്ടന് (38), പാമ്പാടി കാളച്ചന്ത ഭാഗത്ത് മറ്റത്തില്‍ വീട്ടില്‍ അനീഷ് എം.എസ് (35), മണര്‍കാട് തലപ്പാടി ഭാഗത്ത് മീനാട്ടൂര്‍ കിഴക്കേതില്‍ വീട്ടില്‍ നിജോ തോമസ് (42), പുതുപ്പള്ളി കൈതേപ്പാലം പുതുപ്പറമ്പില്‍ വീട്ടില്‍ അഖിലേഷ് കുമാര്‍(33) എന്നിവരെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്.
വിവിധ കേസുകളിലെ പ്രതികളായ അഞ്ചുപേരും കോട്ടയത്ത് എത്തി കവര്‍ച്ചയ്‌ക്ക് പദ്ധതി തയ്യാറാക്കുന്നതായി രഹസ്യവിവരം ലഭിച്ചിരുന്നു. തുടര്‍ന്ന് കോട്ടയം ഈസ്റ്റ് പോലീസ് നടത്തിയ പരിശോധനയിലാണ് കഴിഞ്ഞദിവസം രാത്രിയില്‍ നാഗമ്പടം ഭാഗത്ത് വച്ച് അഞ്ചുപേരെയും പിടികൂടുന്നത്. ഇവരില്‍ സിനാജിന് ചങ്ങനാശ്ശേരി പോലീസ് സ്റ്റേഷനിലും, മണിക്കുട്ടന് മണര്‍കാട് പോലീസ് സ്റ്റേഷനിലും മോഷണക്കേസുകള്‍ ഉണ്ട്. അനീഷിന് തൃശൂര്‍ ഈസ്റ്റ്, കോട്ടയം വെസ്റ്റ്, കുമളി എന്നീ സ്റ്റേഷനുകളിലും, നിജോ തോമസിന് കോട്ടയം വെസ്റ്റ് സ്റ്റേഷനിലും, അഖിലേഷ് കുമാറിന് കോട്ടയം വെസ്റ്റ്, വാകത്താനം എന്നീ സ്റ്റേഷനുകളിലും ക്രിമിനല്‍ കേസുകള്‍ ഉണ്ട്.
കോട്ടയം ഈസ്റ്റ് സ്റ്റേഷന്‍ എസ്എച്ച്ഒ ഷിജു പി.എസ്, എസ്‌ഐമാരായ അരുണ്‍കുമാര്‍, പ്രസന്നകുമാര്‍,സിപിഒമാരായ പ്രതീഷ് രാജ്, സജീഷ് ജെയിംസ്, അജിത്, ദിലീപ്, വിബിന്‍, അജേഷ്, ബിജു, പ്രവീണ്‍ എന്നിവര്‍ ചേര്‍ന്നാണ് ഇവരെ അറസ്റ്റ് ചെയ്തത്. കോടതിയില്‍ ഹാജരാക്കിയ അഞ്ചുപേരെയും റിമാന്‍ഡ് ചെയ്തു.
ജന്മഭൂമി ഓണ്‍ലൈന്‍