കോട്ടയം: നഗര മധ്യത്തിലെ പ്രധാന റോഡുകളിലെ സീബ്രാലൈന്‍ മാഞ്ഞത് അപകട ഭീഷണിയാകുന്നു. ജീവന്‍ പണയം വച്ചുവേണം ഇപ്പോള്‍ നഗരത്തിലെ പ്രധാന റോഡുകള്‍ മുറിച്ചു കടക്കാന്‍. തിരക്ക് കൂടിയ മാര്‍ക്കറ്റ് റോഡിലെയും തിരുനക്കരയിലെയും സീബ്രാലൈനുകള്‍ മാഞ്ഞ് കാണാന്‍ പോലും പറ്റാത്ത അവസ്ഥയാണ്.
തിരക്ക് ഏറെയുള്ള റോഡായതിനാല്‍ ഏറെ ഭീതിയോടെയാണ് കുട്ടികളും പ്രായമായവരും അടക്കമുള്ളവര്‍ റോഡ് കുറുകെ കടക്കുന്നത്. നിറം മങ്ങി കിടക്കുന്ന വരകള്‍ ഡ്രൈവര്‍മാര്‍ക്ക് ഒറ്റനോട്ടത്തില്‍ കാണാന്‍ പറ്റാത്ത സ്ഥിതിയാണ്.
സീബ്ര ലൈന്‍ ഉണ്ടായിരുന്നപ്പോള്‍ പോലും നിര്‍ത്താന്‍ മടിച്ചിരുന്ന വാഹനങ്ങള്‍ ഇപ്പോള്‍ കാല്‍നട യാത്രക്കാരെ കണ്ട ഭാവം പോലും നടിക്കാതെ പായുകയാണ്. സീബ്രാലൈന്‍ മാഞ്ഞു പോയതിനാല്‍ സ്‌കൂള്‍ കുട്ടികളും പ്രായമായവരുമാണ് ഏറെ ബുദ്ധിമുട്ടുന്നത്. പൊരിവെയിലത്തും മഴയത്തും ഏറെ ബുദ്ധിമുട്ടിയാണ് ഇവര്‍ റോഡ് മുറിച്ചു കടക്കുന്നത്.
അപകടങ്ങള്‍ പതിയിരിക്കുന്ന റോഡില്‍ എത്രയും വേഗം സീബ്രാലൈന്‍ വരയ്‌ക്കണമെന്നാണ് ജനത്തിന്റെ ആവശ്യം. ജില്ലയിലെ തിരക്കേറിയ റോഡുകളുടെയും ജങ്ഷനുകളുടെയും സ്ഥിതി ഇതാണ്. സീബ്രാലൈനില്‍ പോലും വാഹനയാത്രക്കാരന്റെ കനിവിനായി കാത്തുനില്‍ക്കേണ്ട സ്ഥിതിയാണുള്ളത്.
