ചെന്നൈ: സിനിമ-നാടക നടനും ചെന്നൈയിലെ അറിയപ്പെടുന്ന മലയാളി സംഘടനാ പ്രവർത്തകനുമായ വി പരമേശ്വരൻ നായർ അന്തരിച്ചു. പക്ഷാഘാതത്തെ തുടർന്ന് കുറച്ച് നാളുകളായി ചികിത്സയിലിരിക്കെയായിരുന്നു അദ്ദേഹം. തിങ്കളാഴ്ച വൈകിട്ടോടെ ചെന്നൈയിലെ സ്വകാര്യ ആശുപത്രിയിൽ വെച്ചായിരുന്നു അന്ത്യം. തൃശൂർ വടക്കാഞ്ചേരി സ്വദേശി പരമേശ്വരൻ നായർ അഞ്ച് പതിറ്റാണ്ടിലേറെയായി ചെന്നൈയിലാണ് സ്ഥിരതാമസം.
തുടക്കത്തിൽ ഏതാനും വർഷം ഇദ്ദേഹം പട്ടാളത്തിൽ സേവനം അനുഷ്ടിച്ചിരുന്നു. പിന്നീട് കേന്ദ്ര സർക്കാർ സ്ഥാപനമായ ഐഡിപിഎലിലെ ജീവനക്കാരനായും സേവനം അനുഷ്ടിച്ചു. സിനിമ, സീരിയൽ, നാടകം, പരസ്യ ചിത്രം എന്നിവയിൽ അഭിനയിച്ചിരുന്നു. അദ്ദേഹം അഭിനയിച്ചതിൽ അനന്തഭദ്രം എന്ന ചിത്രത്തിൽ വെളിച്ചപ്പാടിന്റെ വേഷം ഏറെ ശ്രദ്ധേയമായിരുന്നു.
