ലാഹോര് : ഏഷ്യാ കപ്പിലെ സൂപ്പര് 4ല് പാകിസ്ഥാന് ബംഗ്ലാദേശിനെ 38.4 ഓവറില് 193 റണ്സിന് പുറത്താക്കി. പാകിസ്ഥാന് വേണ്ടി ഹാരിസ് റൗഫും നസീം ഷായും മികച്ച രീതിയില് പന്തെറിഞ്ഞു.
ഹാരിസ് ആറ് ഓവറില് നാല് വിക്കറ്റ് വീഴ്ത്തി. നസീം എറിഞ്ഞ 5.4 ഓവറില് മൂന്ന് വിക്കറ്റും വീഴ്ത്തി.
ഷാക്കിബ് അല് ഹസനും മുഷ്ഫിഖുര് റഹീമും ഒഴികെയുളള ബംഗ്ലാദേശ് ബാറ്റ്സ്മാന്മാര്ക്ക് പാകിസ്ഥാന്റെ ബൗളിംഗിന് മുന്നില് പിടിച്ചു നില്ക്കാനായില്ല.
ടോസ് നേടി ബാറ്റിംഗ് തിരഞ്ഞെടുക്കുകയായിരുന്നു ബംഗ്ലാദേശ്. തന്റെ ആദ്യ പന്തില് തന്നെ മെഹിദി ഹസന് മിറാജിനെ പുറത്താക്കിയ നസീം ബംഗ്ലാദേശിനെ ഞെട്ടിച്ചു. രണ്ട് ഓവറുകള്ക്ക് ശേഷം ഷഹീന് ഷാ അഫ്രീദി ലിറ്റണ് ദാസിനെ 16(13)ന് പുറത്താക്കുകയും ചെയ്തു.
ഹാരിസും തന്റെ ആദ്യ ഓവറില് ഒരു വിക്കറ്റ് വീഴ്ത്തി. മുഹമ്മദ് നയീമിനെ 20(25) പുറത്താക്കി.അടുത്ത ഓവറില് 2(9) ന് തൗഹിദ് ഹൃദോയിയെയും പുറത്താക്കി. ആദ്യ പവര്പ്ലേയില് 47/4 എന്ന നിലയില് ഒതുങ്ങിയ ബംഗ്ലാദേശിനെ ഷാക്കിബും മുഷ്ഫിഖറും കതരകയറ്റി. അഞ്ചാം വിക്കറ്റില് ഇരുവരും 100 റണ്സ് കൂട്ടിച്ചേര്ത്തു. ഷാക്കിബിനെ 53(57) ഫഹീം അഷ്റഫ് പുറത്താക്കിയപ്പോള് മുഷ്ഫിഖുര് 64(87) ഹാരിസിന്റെ പന്തില് ക്യാച്ച് നല്കി പുറത്തായി.
